Երեւանի ընդհանուր իրավասության դատարանի Ավան-Նոր Նորք նստավայրում այսօր դատավոր Հարություն Մանուկյանի նախագահությամբ շարունակվեց Ազգային ժողովի նախկին նախագահ Արա Բաբլոյանի եւ ԱԺ աշխատակազմի ղեկավարի նախկին տեղակալ Արսեն Բաբայանի գործով դատական նիստը։
Հիշեցնենք, Արա Բաբլոյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ եւ 314-րդ հոդվածի 1-ին մասերով՝ պաշտոնական լիազորությունների չարաշահման եւ պաշտոնեական կեղծիք իրականացնելու համար: Իսկ Արսեն Բաբայանին` ՀՀ քրեական օրենսգրքի 38-308-րդ հոդվածի 2-րդ եւ 314-րդ հոդվածի 1-ին մասերով՝ պաշտոնական լիազորությունների չարաշահմանը եւ պաշտոնական կեղծիք իրականացնելուն օժանդակելու համար:
Արսեն Բաբայանի շահերի ներկայացուցիչներ Լուսինե Սահակյանը եւ Երվանդ Վարոսյանն այսօր միջնորդեցին Արսեն Բաբայանի նկատմամբ ընտրված խափանման միջոցը վերացնել։ Երվանդ Վարոսյանն այսպես հիմնավորեց իրենց միջնորդությունը՝ եղել է երաշխավոր, եղել են վճարված դրամական միջոցներ, որոնք անիմաստ գտնվում են դատական դեպարտամենտի հաշվին։ Երվանդ Վարոսյանը հիշեցրեց, որ 2018 թվականի հոկտեմբերին ԱԺ-ն համաներման մասին որոշում է կայացրել եւ դա հաշվի առնելով, պաշտպանական կողմը բացարձակապես անիմաստ է համարում այս գործով ամբաստանյալների նկատմամբ խափանման միջոց կիրառելը։ Երվանդ Վարոսյանը քննության խոչընդոտելու պատրվակը բացառում է, քանի որ ոչ Արսեն Բաբայանը, ոչ Արա Բաբլոյանը թաքնվելու մտադրություն չունեն: Պաշտպանի համոզմամբ, այս գործով ցանկացած սահմանափակում առաջացնում է մարդու իրավունքների խախտում:
«Մենք հույս ունենք, որ կլինի օրինական դատական ակտ։ Խափանման միջոցն ընտրվելու պարտադիր պայմանը խափանման միջոցի պայմանն է և հիմքերը։ Երբ Բաբայանի նկատմամբ խափանման միջոց էր ընտրվում, լրիվ այլ մեղադրանք էր, այսինքն՝ լրիվ այլ պայման գոյություն ուներ»,- հավելեց պաշտպան Լուսինե Սահակյանը:
Կարդացեք նաև
Մեղադրող դատախազը առարկեց՝ ասելով, Արսեն Բաբայանի նկատմամբ անձնական երաշխավորությունը տրվել է այն ժամանակ, երբ նրա նկատմամբ խափանման միջոց է եղել կալանքը եւ որոշում է կայացվել կալանքը փոփոխելու եւ անձնական երաշխավորություն կիրառել։ «Այսինքն, այդ փուլում գնահատվել է, որ խափանման միջոց կիրառելու հիմքերն առկա են։ Գտնում եմ, որ դատաքննության ներկա փուլում դեռեւս չեն վերացել այդ հիմքերը»,- ասաց դատախազը։
Դատարանը բավարարեց պաշտպանական կողմի միջնորդությունը
Դատախազությունը պետք է իր մեջ ուժ գտնի, թույլտվություն ստանա Նիկոլ Փաշինյանից, որպեսզի ընդհանրապես հրաժարվի այս մեղադրանքից։
«Շարունակվում է այն ամբողջ պրոցեսը, որը սկսվեց իշխանությունները յուրացնելու, սահմանադրական կարգը տապալելու այս ամբողջ հանցավոր գործընթացում իշխանությունում ներգրավված հանցավոր բանդայի կողմից, ինչի մասին ՀՔԾ հաղորդում ներկայացրել ենք, ինչը ՀՔԾ-ն մերժել է։ Սահմանադրական դատարանի, սահմանադրության փոփոխություններով իրենց խնդիրը, իրենց ցանկություններն արդեն բավարարել են, կամաց-կամաց ժամանակն է հրաժարվել այդ ամբողջ գործընթացից»,- նիստի ավարտից հետո՝ լրագրողների հետ զրույցում ասաց Արսեն Բաբայանը։
Գործով հաջորդ նիստը կկայանա նոյեմբերի 18-ին, 16.00-ին:
Նելլի ԳՐԻԳՈՐՅԱՆ
