Երեւանի ընդհանուր իրավասության դատարանն այսօր բավարարեց Ազգային ժողովի նախկին նախագահ Արա Բաբլոյանի պաշտպան Արամ Վարդեւանյանի միջնորդությունը՝ երկրից որոշ ժամանակով մեկնելու մասին:
Այսօր շարունակվող դատական նիստում ներկայացված միջնորդության դեմ՝ մեղադրող դատախազը չառարկեց, դատավոր Հարություն Մանուկյանն էլ բավարարեց միջնորդությունը՝ հաշվի առնելով Արա Բաբլոյանի անձը, նրա կապը Հայաստանի հանրապետության հետ: Դատավորը նաեւ կարծում է, որ Արա Բաբլոյանի զբաղեցրած պաշտոնը թույլատրում է նրան նշված ժամանակահատվածով, նշված վայր մեկնել եւ վերադառնալ։
Հիշեցնենք, Արա Բալոյանին մեղադրանք է առաջադրվել ՀՀ ՔՕ 308-րդ հոդվածի 2-րդ եւ 314-րդ հոդվածի 1-ին մասերով։ Ըստ մեղադրանքի, 2018-ին հանդիսանալով ՀՀ Ազգային ժողովի նախագահ, իբրեւ մշտապես իշխանության ներկայացուցչի գործառույթներ իրականացնող պաշտոնատար անձ, Արա Բաբլոյանը չարաշահել է իր պաշտոնեական լիազորությունները, որն անզգուշությամբ առաջացրել է ծանր հետեւանքներ, ինչպես նաեւ կատարել է պաշտոնեական կեղծիք։
Նելլի ԳՐԻԳՈՐՅԱՆ
