ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի՝ սեպտեմբերի 7-ին գումարված նիստում քննարկվել է ՀՀ Կառավարության ներկայացրած «Երեխայի իրավունքների մասին» օրենքում լրացումներ կատարելու մասինե օրենքի նախագիծը:
ՀՀ առողջապահության նախարարի տեղակալ Անահիտ Ավանեսյանը տեղեկացրել է, որ առաջարկվում է «Երեխայի իրավունքների մասին» ՀՀ օրենքի 32-րդ հոդվածը լրացնել նոր մասերով, որով նախատեսվում է, որ 16 տարին լրացած երեխայի՝ հոգեբուժական միջամտություն ստանալու կամ դրանից հրաժարվելու վերաբերյալ գրավոր իրազեկված համաձայնությունը, բացառությամբ օրենքով նախատեսված դեպքերի, տալիս է նա, եթե բժիշկ-հոգեբույժի կարծիքով 16 տարին լրացած երեխան ունակ է հասկանալու հոգեբուժական միջամտության կամ դրա բացակայության հնարավոր հետեւանքները, այդ տեղեկությունները չեն վնասի 16 տարին լրացած երեխային, կդյուրացնեն նրան հոգեբուժական օգնության եւ սպասարկման տրամադրումը:
16 տարին չլրացած երեխայի գրավոր իրազեկված համաձայնությունը տալիս է նրա օրինական ներկայացուցիչը, բացառությամբ օրենքով նախատեսված դեպքերի: Նախատեսվում է, որ երեխայի հոգեբուժական օգնությունը եւ սպասարկումն իրականացնելիս նրա կարծիքն ամրագրելը պարտադիր է:
Պատգամավորների հարցերին ի պատասխան փոխնախարարը նշել է, որ այն դեպքում, երբ եւ երեխան, եւ նրա օրինական ներկայացուցիչը հրաժարվում են հոգեբուժական օգնությունից եւ հոսպիտալացումից, ապա այդ դեպքում որոշում կայացնում է դատարանը՝ ծանոթանալով բժշկական մասնագիտական հանձնաժողովի եզրակացությանը: Կասկածներ ունենալու պարագայում դատարանն իրավասու է պահանջել կրկնակի բժշկական փորձաքննություն, լսել երեխային եւ նրա օրինական ներկայացուցչին, որից հետո կայացնել որոշում:
Կարդացեք նաև
Փոխնախարարը պարզաբանել է, որ այս փոփոխությունների նպատակը ՀՀ Սահմանադրությանը հակասող դրույթների վերացումն է: Օրենսդրական նախաձեռնությունն ստացել է հանձնաժողովի դրական եզրակացությունը, այն կընդգրկվի ՀՀ ԱԺ առաջիկա հերթական նիստերի օրակարգի նախագծում:
Ընդունվելուց հետո օրենքն ուժի մեջ կմտնի պաշտոնական հրապարակումից երեք ամիս հետո:
Նիստի օրակարգում ընդգրկված երկու այլ օրենսդրական նախաձեռնությունների քննարկումը հեղինակների առաջարկով մինչեւ երկու ամսով հետաձգվել է:
ՀՀ ԱԺ
