Սահմանադրական դատարանի՝ լիազորությունները դադարեցված նախագահ Հրայր Թովմասյանի եւ նրա սանիկի՝ արդարադատության նախարարության նախկին պաշտոնյա Նորայր Փանոսյանի գործով դատական նիստն այսօր հետաձգվեց: Մեղադրյալ Նորայր Փանոսյանի ընտանիքի անդամը վարակված է կորոնավիրուսով:
Լրագրողները Հրայր Թովմասյանից հետաքրքրվեցին՝ դատարան չի գնում, լուծվա՞ծ է ՍԴ ճգնաժամը: «Ես գնում եմ դատարան»,-պատասխանեց Հրայր Թովմասյանը: Հիշեցնենք, որ Հրայր Թովմասյանը մեղադրվում է պաշտոնեական լիազորությունները չարաշահելու համար: Ըստ մեղադրանքի՝ արդարադատության նախարար եղած ժամանակ Հրայր Թովմասյանը Փանոսյանի հետ հանցակցությամբ, օգտագործելով 2 նոտարների իրենից ունեցած կախյալ վիճակը, 2013թ-ին վերջիններիս հետ ձեռք է բերել նրանց համար ակնհայտ ոչ շահավետ գնով տարածքը վարձակալությամբ հանձնելու պայմանավորվածություն. արդյունքում՝ Թովմասյանը նոտարներից յուրաքանչյուրից մինչև 2014 թվականի ապրիլն ամսական ստացել է 800 հազար դրամ վարձավճար՝ ընդհանուր 11 միլիոն 200 հազար դրամ:
Մամուլում հրապարակվել է Հրայր Թովմասյանի նախաքննական ցուցմունքը: Մեկ այլ գործով մեղադրանք է առաջադրված նաեւ Հրայր Թովմասյանի նախկին վարորդին: Հիշեցնենք, որ ՍԴ նախագահ Հրայր Թովմասյանի եւ ՍԴ երեք դատավորների լիազորությունները դադարեցվեցին վերջերս՝ ուժի մեջ մտած սահմանադրական փոփոխությունների արդյունքում:
Հաջորդ դատական նիստը նշանակվել է սեպտեմբերի 14-ին:
Կարդացեք նաև
Լուիզա ՍՈՒՔԻԱՍՅԱՆ
