Գերմանիայի կանցլեր Անգելա Մերկելը չի բացառել Ռուսաստանի դեմ պատժամիջոցների սահմանումը, որոնք կարող են վերաբերել «Հյուսիսային հոսք 2» գազատարի շինարարությանը։ Այս մասին սեպտեմբերի 7-ին հայտնել է Գերմանիայի կառավարության պաշտոնական ներկայացուցիչ Շտեֆեն Զայբերթը։
«Կանցլերը միացել է Գերմանիայի արտգործնախարարի՝ հանգստյան օրերին արված հայտարարությանը»,- ասել է Զայբերթը՝ մեկնաբանելով Ալեքսեյ Նավալնուն թունավորելու գործով ԵՄ հնարավոր արձագանքի մասին հարցը։
Նշենք, որ նախօրեին Գերմանիայի արտգործնախարար Հայկո Մասն առաջին անգամ փոխկապակցել էր Նավալնու թունավորման ու գազատարի շինարարության հարցերը։ «Հուսով եմ՝ ռուսաստանցիները մեզ չեն ստիպի փոխել «Հյուսիսային հոսքի» հարցով մեր դիրքորոշումը»,- ասել էր նա և խոստովանել, որ շինարարության դադարեցումը վնաս կհասցնի գերմանական և եվրոպական ընկերություններին։ Սակայն նա նաև նշել էր, որ սխալ կլիներ ի սկզբանե բացառել նման ելքը։
Հիշեցնենք, որ Գերմանիայի ԶՈւ (Բունդեսվերի) հատուկ լաբորատորիան տոքսիկոլոգիական անալիզների համար նմուշառում էր կատարել Բեռլինի «Շարիտե» հիվանդանոցում գտնվող Նավալնուց: Բունդեսվերի փորձագետները վերցրած նմուշներում հաստատել են «Նովիչոկ» խմբին պատկանող քիմիական նյութի առկայությունը: Պաշտոնական Բեռլինը հայտարարել էր, որ Գերմանիան այս մասին կիրազեկի ԵՄ-ում և ՆԱՏՕ-ում իր գործընկերներին, ինչպես նաև Քիմիական զենքի արգելման կազմակերպությանը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
