Հայաստանն ավարտին է հասցրել Եվրոպայի խորհրդի՝ Երեխաներին սեռական շահագործումից և սեռական բռնությունից պաշտպանելու մասին կոնվենցիայի վավերացման գործընթացը։ Այսպիսով՝ մեր երկիրը դարձել է Լանզարոտեի կոնվենցիան վավերացրած 47-րդ պետությունը։ Այսօր Եվրոպայի խորհրդում Հայաստանի մշտական ներկայացուցիչ դեսպան Պարույր Հովհաննիսյանը Եվրոպայի խորհրդի գլխավոր քարտուղարի տեղակալ Գաբրիելա Բատաինի-Դրագոնիի ներկայությամբ հանձնել է վավերացումը հաստատող փաստաթուղթը, հայտնում են Եվրոպայի խորհրդի մամուլի ծառայությունից։
Նշենք, որ Կոնվենցիան Հայաստանում ուժի մեջ է մտնում 2021թ․ հունվարի 1-ից։
Եվրոպայի խորհրդի գլխավոր քարտուղարի տեղակալ Բատաինի-Դրագոնին ողջունել է Հայաստանի կողմից Լանզարոտեի կոնվենցիայի վավերացումը և նշել, որ Կոնվենցիան յուրահատուկ գործիք է երեխաների դեմ հանցագործությունների կանխման և դրանց դեմ պայքարի համար։
Նշենք, որ Լանզարոտեի կոնվենցիան վավերացրել են Եվրոպայի խորհրդի բոլոր անդամ երկրները, բացի Իռլանդիայից և Թունիսից։
Եվրոպայում 18 տարեկանը չլրացած 5 երեխայից մեկը սեռական բռնության զոհ է դառնում։ Լանզարոտեի կոնվենցիան պետություններին պարտավորեցնում է քրեականացնել երեխաների դեմ սեռական ոտնձգությունները, այդ թվում՝ վիրտուալ տիրույթում, ասված է հաղորդագրության մեջ։
Պատրաստեց Վիկտորյա ԱՆԴՐԵԱՍՅԱՆԸ
