«Օրական մարդ եք բռնում, ասում եք՝ սաղ հետ ենք բերում, բա մերը խի՞ չեք հետ բերում: Եթե ասում եք՝ Խաչատրյան Գագոն թալանել է, փող ենք հետ բերում, բա էդ բերածից մեզ խի՞ չեք տալիս, մենք էլ ենք կաշառք տվող եղել: Մի հատ նայեք՝ ում եք բռնում: Ամբիցիաների համար եք բռնում»,-այսօր կառավարության առաջ մի արկղ բուկլետներ շաղ տալուց հետո, լրագրողների հետ զրույցում ասաց գործարար Արմենակ Խաչատրյանը, որի տունն այս պահին բանկում գրավադրված է:
Բուկլետները նոր բիզնես ծրագրեր էին, որոնց, գործարարի խոսքով, կառավարությունը հավանություն չի տվել: Վստահեցնում է՝ պայքարը քաղաքական չէ, ո՛չ ընդդիմության, ո՛չ որեւէ կուսակցության ներկայացուցիչ է, պարզապես, բիզնեսը կորցնելուց հետո՝ որոշել է նոր բիզնես-ծրագիր գրել, որով կվերականգնի Հայաստանի գյուղերի բարեկեցությունը: Նրա խոսքով՝ երեք ամիս որեւէ պատասխան կառավարությունից չեն տվել:
Հարցին՝ ի՞նչ խնդիրներ ունի, ինչո՞ւ է բիզնեսը կորցրել, գործարարը չցանկացավ պատասխանել՝ միայն ասաց. «Ասենք՝ ինֆլյացիա եղավ. այս-այն, բայց իմ բարոյականությունը չէր ներում, որ դոլարի թանկացմանը զուգահեռ՝ ես էլ միսը թանկացնեի»:
Ըստ գործարարի, կորցրած բիզնեսը թռչնաբուծական ֆաբրիկա էր. «Իմը կորած է, ես հիմա մյուս գյուղացիների համար եմ պայքարում: Եթե սրան ընթացք չտվեցին՝ սա շարունակվելու է: Հինը վատ էր՝ հիմա վատ է, բա ե՞րբ է լավ լինելու: Արմավիրի մարզում 40 հազար հեկտար հող չի մշակվում: Լայք, դիսլայքով երկիր չես կառավարի»:
Գործարարն ասաց, որ ծրագիր էր գրել գյուղերում բնակարան, դիմացը ջերմատուն եւ գոմ կառուցելու, քանի որ մեր գյուղերում ազատ հողատարածքները շատ են, բայց՝ անարդյունք. «Ամեն ծրագիրը բարձր եկամտաբերությամբ է: Վերջին անգամ եղել եմ Նիգավան գյուղում 600 հեկտար հողից մշակվում է 50 հեկտարը: Գյուղերի վիճակը շատ վատ է, ցեցը կերել է բերքը, սրա համար համատարած պայքար պետք է լինի: Այս ամենը գյուղերը կործանման է տանում»:
Լրագրողների հետ զրույցի ժամանակ գործարարին մոտենում էին ոստիկաններ՝ որոշ հարցեր ճշտելու, սակայն Արմենակ Խաչատրյանը հրաժարվում էր նրանց հետ առանձնանալ: Ոստիկանները հայտնեցին, որ տարածքը բուկլետներով կեղտոտելու համար քաղաքացին պետք է տուգանվի:
Գործարարը խոստացավ ամեն շաբաթ մի տարածաշրջանի խնդիրները հավաքել ու բերել կառավարության առաջ դնել. «Գյուղերը նրանք չեն, որոնք տեսնում եք՝ սիրուն ասֆալտապատած, իրականում մեր գյուղերը շատ վատ վիճակում են»:
Լուսինե ԲՈՒԴԱՂՅԱՆ
