Հետաքրքիր գաղափարներ արտակարգ դրության ժամանակ ամուսնական արարողություն կազմակերպելու համար կամ ինչպե՞ս են անցկացվում կարանտինային հարսանիքները:
COVID-19-ը փոփոխություններ է մտցրել նաև միջոցառումների կազմակերպման ծառայությունների ոլորտում: Բազմամարդ հավաքույթներն արգելված են, հետևաբար զանգվածային միջոցառումներ չեն կազմակերպվում, հարսանիքներն էլ դարձել են սակավաթիվ մասնակիցներով:
Այս պատճառով ինչպես Հայաստանում, այնպես էլ ողջ աշխարհում հարսանիքների կազմակերպման նոր տարբերակներ են մշակվել: Օրինակ՝ տարածված են zoom-ով հարսանիքները: Դրա համար ամուսնացող զույգ ուղարկում է առցանց հղումը, որպեսզի բարեկամներն ու ընկերները նշված ժամին մուտք գործեն և առցանց հետևեն իրենց հարսանեկան արարողությանը: Նույնիսկ zoom-ով կենացներ են ասում բարեկամները: Տարբերակ է նաև այն, որ հարսանիքի հյուրերը հարսանեկան արարողությանը հետևում են իրենց մեքենաներում:
Արտերկրում ընդունված է այն, որ նորապսակներն իրենց մեքենայով շրջում են իրենց հարազատների, ընկերների թաղամասերով, իսկ նրանք իրենց տան պատուհաններից ողջույններ են ուղարկում նորապսակներին: Տարածված են նաև վրանային հարսանիքները, երբ զույգն ամուսնանում է քաղաքից դուրս որևէ տեսարժան վայրում, խնջույքը պիկնիկի սեղանի շուրջ է, իսկ երեկոյան խարույկ են վառում ու գիշերն անցկացնում վրաններում:
Կարդացեք նաև
Aravot.am-ը «Ֆեմինի» նախագծի «Մասնագիտությունը՝ մայրիկ» խորագրի ներքո «Arm show wedding» հարսանեկան միջոցառումների կազմակերպման կենտրոնի տնօրեն Արմեն Գևորգյանից հետաքրքրվեց՝ հայաստանյան շուկայում ի՞նչ փոփոխություններ կան այս ոլորտում, հիմա հարսանիքների կազմակերպման ի՞նչ տարբերակներ են նորաձև և այսպես կոչված՝ թրենդային:
Նա պատասխանեց. «Առաջին հերթին համավարակը հանգեցրեց ֆինանսական մեծ կորուստների: Այն ծառայությունները, որոնք նախկինում մատուցում էինք՝ շոու ծրագրեր, թամադաների ծառայություն, երաժիշտներ, ձայնային լուսային տեխնիկա, այդ ամենը 70-80 տոկոսով կրճատվել է: Քանի որ հարսանիքների մասնակիցները սակավաթիվ էին, կենդանի երաժշտությունն էլ ՀՀ պարետի որոշմամբ արգելված էր, մարդիկ ուղղակի դիջեյ էին նախընտրում: Վարձակալում էին սեփական տուն՝ քաղաքից դուրս, կազմակերպում ԶԱԳՍ-ի փոքր արարողություններ և փոքր խնջույքի պես մի բան ու դրանով եզրափակում»:
Արմեն Գևորգյանը նաև նշեց, որ տարբեր պատմաճարտարապետական հուշակոթողների բակերում էլ էին կազմակերպում հարսանիքներ: Օրինակ՝ Սաղմոսավանքի շրջակայքում տարածք կա, որտեղ ֆուրշետ էին կազմակերպել, լարային քառյակ հրավիրել: Մեր զրուցակիցն ասաց, որ մարդիկ հարսանիքներին այլևս շոու ծրագրեր, երաժշտական խմբեր չեն հրավիրում, քանի որ մեծ ռեստորաններում չեն կազմակերպում հարսանիքները: Ե′վ պարետը մեծաթիվ հավաքներ թույլ չի տալիս, և′ ռեստորաններին ձեռնտու չէ փոքրաթիվ հավաքներ կազմակերպելը: Ըստ Արմեն Գևորգյանի՝ հիմա մարդիկ ավելի շատ մատչելիությանն են ուշադրություն դարձում, անգամ համաձայն են, որ հարսանիքի վայրը ձևավորվի արհեստական ծաղիկներով, ինչը նախկինում հազվադեպ էր հանդիպում: Նրա տեղեկացմամբ՝ Հայաստանում կարանտինային օրերին տարածված են ԶԱԳՍ-ի արարողությունները՝ բացօթյա, որն արվում է նաև նկարահանումների համար:
Տաթև ՀԱՐՈՒԹՅՈՒՆՅԱՆ
