Ռուս ընդդիմադիր գործիչ Ալեքսեյ Նավալնին թունավոր նյութի կիրառմամբ հարձակման զոհ է դարձել, հայտարարել է Գերմանիայի կառավարության պաշտոնական ներկայացուցիչ Շտեֆան Զայբերթը:
Նրա խոսքով՝ Գերմանիայի ԶՈւ (Բունդեսվերի) հատուկ լաբորատորիան տոքսիկոլոգիական անալիզների համար նմուշառում է կատարել Բեռլինի «Շարիտե» հիվանդանոցում գտնվող Նավալնուց: Բունդեսվերի փորձագետները վերցրած նմուշներում հաստատել են «Նովիչոկ» խմբին պատկանող քիմիական նյութի առկայությունը:
Պաշտոնական Բեռլինը ՌԴ-ին կոչ է արել հայտարարություն տարածել այդ կապակցությամբ, ընդգծել է Զայբերթը և նշել, որ Գերմանիան այս մասին կիրազեկի ԵՄ-ում և ՆԱՏՕ-ում իր գործընկերներին, ինչպես նաև Քիմիական զենքի արգելման կազմակերպությանը:
Դրանից առաջ ստեղծված իրավիճակը քննարկել էին Գերմանիայի կանցլեր Անգելա Մերկելը, արտգործնախարար Հայկո Մասը, ՆԳ նախարար Հորսթ Զեեհոֆերը:
Կարդացեք նաև
Հիշեցնենք, որ Ալեքսեյ Նավալնին օգոստոսի 20-ին իրեն վատ էր զգացել Տոմսկից Մոսկվա թռիչքն իրականացնող օդանավում: Օմսկում արտակարգ վայրէջք կատարած ինքնաթիռից նրան տեղափոխել էին հիվանդանոց: Նավալնուն հոսպիտալացրել էին անգիտակից վիճակում և միացրել թոքերի արհեստական օդափոխության սարքին: Կոմայի մեջ գտնվող ընդդիմադիր գործչին օգոստոսի 22-ին տեղափոխել էին Գերմանիա:
Պատրաստեց՝ Վիկտորյա ԱՆԴՐԵԱՍՅԱՆԸ
