Հարցազրույցներ, վերլուծություն, հոբբիներ՝ սպորտ, ինքնազարգացում, գրքեր, ընթերցանություն…Ռուսական РБК հեռուստաընկերությանը տված հարցազրույցում երկրորդ նախագահ Ռոբերտ Քոչարյանն այսպես սկսեց թվարկել, թե ինչով է զբաղվում այս ընթացքում:
Նա ասաց, որ իր «Կյանք ու ազատություն» ինքնակենսագրական գրքի շարունակությունն է գրում, երկրորդ մասը, որի սյուժեն դեռ չի ավարտվել:
Խոսելով դատական գործընթացի, իր նկատմամբ հարուցված քրգործի մասին՝ Քոչարյանն ասաց, որ իր համար դա ժամանակի անիմաստ կորուստ է, անհեթեթ մեղադրանք. «Իմ փաստաբանները մինչեւ հիմա չեն կարողանում հասկանալ՝ ինչում են ինձ մեղադրում ընդհանրապես: Մեղադրել նախագահին իր պաշտոնական եւ սահմանադրական պարտականությունները կատարելու մեջ, դա իրավական խաբկանք է: Մենք փորձում ենք ավելի շուտ ոչ թե դատարանին, դատավորին, այլ ժողովրդին բացատրել, թե ինչ է կատարվում: Կարծում եմ, մեզ մոտ դա ստացվում է»:
Քոչարյանն ասաց, որ վերջին 1,5 տարում իր կյանքում կտրուկ շրջադարձ է եղել. «Ես ստիպված էի ամեն ինչ զրոյից սկսել: Այսօր ստեղծվել են քաղաքական պայքարի շատ լուրջ գործիքներ: Ստեղծվել է լավ ֆունկցիոնալ թիմ, որը բավականին լավ ներկայացված է լրատվական դաշտում, բավականին լավ է ներկայացված ինտերնետային ռեսուրսներում եւ ունի լավ դիրքեր սոցիալական ցանցերում: Այսինքն ՝ սա մի բան է, առանց որի քաղաքական պայքարն անհնար է ժամանակակից պայմաններում»:
Կարդացեք նաև
Հարցին՝ լսել ենք, որ Հայաստանում ընդդիմությունը վերահսկում է գրեթե բոլոր ԶԼՄ-ները ճի՞շտ է դա՝ Քոչարյանը պատասխանեց, որ այնքան էլ այդպես չէ. «Բայց փորձագիտական համայնքի առումով, մտավորականության առումով, ովքեր ունակ են վերլուծել իրավիճակները, խոսել, որոշ հարցազրույցներ տալ, համեմատություններ կատարել, վերլուծություններ կազմել, այսինքն ՝ ստեղծել իմաստալից, հետաքրքիր բովանդակություն, մենք անկասկած գերակշռում ենք»:
Ըստ նրա, մարդիկ 2018-ի էյֆորիայից դուրս են եկել:
Խոսելով Հայաստանում թավշյա հեղափոխության պատճառների մասին՝ հարց եղավ, թե դա Սերժ Սարգսյանի անձնական որոշման պատճառո՞վ էր, թե՞ այլ պատճառներ էլ կային՝ Քոչարյանը պատասխանեց. «Այլ պատճառներ կային: Իհարկե, հոգնածություն կար ՀՀԿ-ի իշխանությունից: Բայց, կարծում եմ, կար մի պոպուլիստական ալիքի ակնհայտ թրենդ, որն այս տարիների ընթացքում տարածվեց, ի դեպ, ամբողջ Եվրոպայում: Դա, հավանաբար, պայմանավորված է սոցիալական ցանցերի զարգացման, ընդհանրապես տեղեկատվական դաշտի ապակենտրոնացման հետ: Եվ իշխանությունները չհասցրեցին իրենց քաղաքական գործիքները հարմարեցնել այդ իրավիճակին: Այն ուժերը, որոնք օգտվեցին այդ իրավիճակից, բավականին լավ կառավարում էին այդ տեղեկատվական թվացյալ քաոսը»:
Քոչարյանն ընդգծեց, որ այդ տեխնոլոգիան չէր աշխատի, եթե որոշակի հիասթափություն չլիներ, բայց երբ կար երկրում հասունացած այդպիսի իրավիճակ, տեխնոլոգիաները փայլուն աշխատեցին:
Ներկայումս Բելառուսում կատարվող իրադարձությունները Քոչարյանին հիշեցնում են 2018-ի հայաստանյան հեղափոխությունը: Թե ինչով են նման՝ Քոչարյանը չպատասխանեց՝ ասելով, որ ավելի հեշտ է ասել տարբերությունները, մնացյալ ամեն ինչ նույնն է. «Արեւմտյան երկրների վերաբերմունքը Բելառուսի նկատմամբ ամբողջովին տարբերվում էր Հայաստանի նկատմամբ արեւմտյան երկրների վերաբերմունքից: Հայաստանի իշխանությունները օբյեկտիվորեն շատ ավելի հանդուրժող էին այլախոհության նկատմամբ, ՀՀԿ-ն ու նախագահը ակտիվորեն համագործակցում էին նաեւ արեւմտյան երկրների հետ. Մենք քաղբանտարկյալներ չունեինք, լրագրողների ծեծեր եւ խորհրդավոր անհետացումներ չկային: Ավելին, ՀՀԿ-ն Եվրոպական ժողովրդական կուսակցության անդամ էր եւ բավականին ակտիվ համագործակցում էր միջկուսակցական փոխգործակցության ոլորտում: Այսինքն ՝ իրավիճակն այս համատեքստում այլ էր: Բայց երբ ամեն ինչ սկսվեց, դեսպանատների վերաբերմունքը, այս նույն երկրների վերաբերմունքը բացարձակապես նույնը դարձավ»:
Պատրաստեց Հռիփսիմե ՋԵԲԵՋՅԱՆԸ
