Արցախի նախագահ Արայիկ Հարությունյանը հունիսին հայտարարել էր, որ 2016 թվականի ապրիլյան պատերազմի ժամանակ Ստեփանակերտի օդն անպաշտպան էր: ՀՀ երրորդ նախագահ Սերժ Սարգսյանն իր ասուլիսում վերջերս նշել է՝ «եթե Արցախի օդային սահմանը լիներ թափանցիկ, ապա Ադրբեջանի օդուժին ոչինչ չէր խանգարի ռմբակոծելու այդ թվում Ստեփանակերտը»: Սերժ Սարգսյանը նաեւ ասել է, որ որեւէ թռչող սարք Ստեփանակերտի երկնքում չի հայտնվել եւ Ադրբեջանի ոչնչացված ԱԹՍ-ներն առաջնագծից 10-11 կմ հեռավորության վրա են եղել: Մինչդեռ 2016 թվականի ապրիլին նախագահ Բակո Սահակյանի խոսնակ Դավիթ Բաբայանը ԶԼՄ-ների հարցադրմանն ի պատասխան նշել էր, որ Ստեփանակերտի օդային տարածքում հայտնված ԱԹՍ-ն ոչնչացվել է Արցախի ՀՕՊ-ի կողմից: Լրագրողներն այսօր Արցախի նախագահ Արայիկ Հարությունյանին խնդրեցին պարզաբանել իր պնդումը:
«Դավիթ Բաբայանը երեւի ճիշտ չի մեկնաբանել՝ խոցել ենք բազմաթիվ թռչող անօդաչու սարքերից մեկը: Ապրիլյան օրերի մասին է խոսքը, երբ Դավիթ Բաբայանն ասել է, որ Ստեփանակերտի վրա ԱԹՍ ենք խոցել»,-նշեց Արայիկ Հարությունյանը:
«Քանակը չգիտեմ, բայց բազմաթիվ ԱԹՍ-ներից մեկը հաջողվել է խոցել: Կարծում եմ՝ սա բավարար է, այլ մեկնաբանություններ չանենք, իմ ասածը հստակ է: Հարցրեք ստեփանակերտցիներին՝ ապրիլյան օրերին քանի՞ ԱԹՍ են տեսել: Մի հատ չէ, որ եղել է»,-եզրափակեց Արայիկ Հարությունյանը:
Կարդացեք նաև
Լուիզա ՍՈՒՔԻԱՍՅԱՆ
