«Վերջին շրջանում Ադրբեջանից խիստ իրարամերժ ազդակներ եւ հայտարարություններ են լինում, որոնց հիման վրա ենթադրում ենք՝ հուլիսյան մարտերը հուժկու հարված են հասցրել Ադրբեջանի ոչ միայն ԶՈՒ-ին, այլեւ՝ դիվանագիտական ներուժին»,-լրագրողների հետ հանդիպմանն այսօր անդրադառնալով Ադրբեջանի նախագահի խորհրդականի հայտարարությանը, թե Ադրբեջանը մտահոգված է Ռուսաստանի կողմից Հայաստանին զենքի մատակարարմամբ, ասաց ՀՀ ԱԳՆ մամուլի խոսնակ Աննա Նաղդալյանը:
«Որքան էլ Ադրբեջանի դիվանագիտական ներուժի դեգրադացիան շարունակվի, հայկական կողմն այդ մակարդակին չի իջնելու: Ըստ ադրբեջանական կողմի վարկածի՝ երկկողմ դաշնակցային հարաբերություններ ունեցող ՀՀ-ն եւ Ռուսաստանը չպետք է սերտ համագործակցեն նաեւ ռազմարդյունաբերության ոլորտում: Գուցե բացահայտում անեմ Ադրբեջանի համար, բայց ՀՀ-ՌԴ դաշնակցային հարաբերությունները հաստատվել են դեռեւս 90-ականներին: Տարակուսանքի է արժանի այն, որ Ադրբեջանը հենց այսօր է բացահայտել աշխարհաքաղաքական այդ իրականությունը»,-նկատեց Աննա Նաղդալյանը:
Ինչ վերաբերում է հարցին, թե ապագայում սպասվո՞ւմ է ՀՀ եւ Ադրբեջանի ԱԳ նախարարների հանդիպում, Աննա Նաղդալյանը նախ շեշտեց՝ ՀՀ-ն մշտապես պատրաստ է խաղաղ գործընթացի տրամաբանության մեջ հանդիպումներ ունենալ. «Ի գիտություն ենք ընդունել խաղաղ գործընթացի վերականգնման վերաբերյալ Ադրբեջանի ԱԳ նախարարի հայտարարությունը՝ Ռուսաստան այցի ժամանակ: Իսկ երբ կլինեն հստակ ժամկետներ հանդիպման համար, կտեղեկացնենք: Հուլիսյան մարտերից հետո հայկական կողմը ներկայացրել է խաղաղ գործընթացի վերաբերյալ իր մոտեցումները, որոնք հուլիսին հրապարակել է վարչապետ Նիկոլ Փաշինյանը: Առանցքային են ուժի կիրառման բացառումը, հրադադարի ռեժիմի ամրապնդումը: Մեր գնահատմամբ՝ այդ մոտեցումներն առաջնահերթ են նաեւ ԵԱՀԿ-ի համար»:
Կարդացեք նաև
Լուիզա ՍՈՒՔԻԱՍՅԱՆ
Լուսանկարը՝ Հայկ Մանուկյանի
