Միջազգային կարգի մրցավար Աշոտ Վարդապետյանը, որին երկու անգամ վստահվել է իրականացնել շախմատի աշխարհի չեմպիոնի տիտղոսի համար մրցամարտերի գլխավոր մրցավարի պարտականությունները, վստահ է, որ ինտերնետը դեռ պատրաստ չէ այնպիսի խոշոր մրցաշարեր կազմակերպելու համար, ինչպիսին առնցանց օլիմպիադան է:
Սակայն մասնագետին ավելի շատ այլ բան է մտահոգում՝ շախմատիստների միջեւ համերաշխության բացակայությունը: «Ինձ համար ամենացավալին այն է, որ շախմատիստները միմյանց միջեւ սոլիդար չեն, շախմատային աշխարհում համերաշխություն չկա: Ասեմ, թե ինչ նկատի ունեմ: Բոլոր մարզաձեւերում կա արդար խաղ (fair play) հասկացությունը: Օրինակ՝ ֆուտբոլում, երբ ֆուտբոլիստը վնասվածք է ստանում, մրցակիցը գնդակը խաղադաշտից դուրս է հանում: Կամ եղել է դեպք, երբ մրցավարը գոլը գրանցել է, իսկ դրա հեղինակը մոտեցել եւ ասել է, թե գոլը խփել է կանոնների խախտումով:
Օնլայն օլիմպիադայում Հնդկաստանի հետ քառորդ եզրափակչի առաջին մրցամարտին տեղի ունեցած միջադեպի պահով Հայաստանը բողոքարկեց եւ ապացուցեց, որ կապի խափանումը իր մեղքով չի եղել: Իմ պատկերացմամբ, հնդիկները, եթե մի փոքր շնորհք ունենային, մանավանդ, որ իրենց առաջնորդում էր Վիշվանաթան Անանդը, իրենք պետք է պնդեին, որ Հայկ Մարտիրոսյանի հետ պարտիայում դիրքը հավասար էր, պետք է ՖԻԴԵ-ին դիմեին, որպեսզի այդ պարտիայում եւ այդ օրվա մրցամարտում գրանցվեր ոչ-ոքի: Թող արդար, ազնիվ պայքարը շարունակվեր հաջորդ օրը եւ արժանիորեն հաղթեր ավելի ուժեղ հավաքականը: Ինձ հետաքրքրում է, թե իրենց որքանո՞վ է բավարարել, որ Հայաստանի հավաքականի նկատմամբ իրենց օգտին հաղթանակ գրանցվեց այդ ճանապարհով:
Ցավալին նաեւ այն է, որ նույն բանը կատարվեց իրենց հետ, սակայն հնդիկները չտուժեցին, այլ ընդհակառակը՝ ոսկե մեդալներ նվեր ստացան:
Կարդացեք նաև
Նույն արդար խաղի գաղափարը չտեսանք նաեւ Ռուսաստանի հավաքականում, որովհետև Հնդկաստանի հետ եզրափակիչ մրցաշարը պիտի ավարտվեր ոչ-ոքի եւ անցկացվեր արմագեդոն: Միակ մարդը, որ այս խնդիրների շուրջ արտահայտվել է, Ռուսաստանի հավաքականի անդամ Ալեքսանդրա Կոստենյուկն է, որը հարց է տվել՝ իսկ ինչո՞ւ Հայաստանի հետ այլ կերպ վարվեցին»,-ասաց Աշոտ Վարդապետյանը:
Աշոտ ՀԱԿՈԲՅԱՆ
