Ոստիկանի նկատմամբ բռնություն գործադրելու եւ խուլիգանություն կատարելու համար կասկածվող ֆուտբոլիստ Գոռ եւ Էդգար Մալաքյանների ձերբակալման որոշումը բողոքարկվել է դատարան:
«Հայկական ժամանակ»-ի հետ զրույցում ասաց նրանց պաշտպան Գոռ Միքայելյանը՝ նշելով, որ բողոքը քննվելու է այսօր:
Պաշտոնական տվյալներով՝ երկու եղբայրները, խախտելով հասարակական կարգը, տեւական ժամանակ բարձրաձայն հայհոյանքներ են հնչեցրել, նրանցից մեկը քաշել եւ պոկել է ոստիկանության ծառայողներից մեկի ուսադիրը, մյուսը՝ բռունցքով հարվածել ոստիկանության ծառայողներից մեկի դեմքին՝ պատճառելով մարմնական վնասվածք: Քրեական գործով ոստիկանության 4 ծառայող ճանաչվել է տուժող:
Մալաքյան եղբայրների պաշտպան Գոռ Միքայելյանի հետ մեր զրույցը՝ ստորեւ.
Կարդացեք նաև
– Պարո՛ն Միքայելյան, ի՞նչ դիրքորոշում ունեն Ձեր պաշտպանյալները կասկածանքի վերաբերյալ, ցուցմունք տվե՞լ են:
– Ընդհանուր առմամբ կասկածանքը չեն ընդունում, բովանդակային ցուցմունք առայժմ չեն տվել, ասել են միայն, որ չեն ընդունում, այն, ինչ վերագրվում է իրենց, չի եղել:
– Իսկ ուսադիրը պոկելու եւ ոստիկանի վրա նետելու վերաբերյալ ի՞նչ կասեք:
– Նախ ասեմ, որ դա հանցակազմ չի պարունակում, ինքնին հանցագործություն չէ, երկրորդն էլ քննություն է կատարվում, պիտի դեռ տեսնենք՝ եղել է նման բան, թե չէ, դրա համար ես շեշտը դրա վրա չեմ դնում, որովհետեւ եթե նույնիսկ հաստատված համարենք, այդտեղ հանցագործություն չկա, ուսադիրը կարող է շատ տարբեր հանգամանքներում պոկվել, հեչ պարտադիր չէ, որ պոկեն, եւ կարծում եմ՝ այս պահին դեռ չկա էլ հստակ տվյալ, որ կոնկրետ քաշել պոկել են:
– Ձեր պաշտպանյալները ալկոհոլ օգտագործա՞ծ են եղել:
– Այս պահին գործով հաստատված նման տվյալ չկա:
Միլենա ԽԱՉԻԿՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
