Հայաստանի կանանց շախմատի առաջատար Էլինա Դանիելյանը բավականին խիստ է արտահայտվել ՖԻԴԵ-ի հասցեին այն բանից հետո, երբ համաշխարհային շախմատի ղեկավար մարմինը օնլայն օլիմպիադայում որոշեց հաղթող ճանաչել եզրափակչի մասնակից երկու թիմերին՝ Ռուսաստանին եւ Հնդկաստանին:
«ՖԻԴԵ-ում, իրո՞ք, մտածում են, թե իրենք ամենախելացին են, իսկ մյուսները` հիմար: Ամոթ ու խայտառակություն նրանց՝ զզվելի ու գարշահոտ գործունեության համար: Այն բանից հետո, ինչ տեղի ունեցավ, նրանք պետք է հրաժարական տան: Սա շախմատի համար մեծ խայտառակություն է»,-գրել է Էլինա Դանիելյանը:
Շախմատի օնլայն օլիմպիադայի եզրափակչում Հնդկաստանի հավաքականի մի քանի անդամների օնլայն կապը Chess.com-ի սերվերում խափանվել էր, ինչի համար Ռուսաստանին հաղթանակ էր գրանցվել: Սակայն օլիմպիադայի վճռաբեկ հանձնաժողովի անդամ, ՖԻԴԵ-ի նախագահ Արկադի Դվորկովիչը որոշել էր օլիմպիադայի հաղթող ճանաչել երկու թիմերին էլ:
Ճիշտ նույն պատմությունը եղել էր դրանից երկու օր առաջ՝ քառորդ եզրափակչի Հնդկաստան-Հայաստան առաջին հանդիպման ժամանակ, երբ նույն Chess.com-ի մեղքով խափանվել էր մեր թիմից Հայկ Մարտիրոսյանի հետ կապը եւ Հայաստանին պարտություն էր գրանցվել: Այն ժամանակ ՖԻԴԵ-ն կրկնակի ստանդարտ կիրառելով չէր արձագանքել ՀՇՖ-ի բողոքին, ինչի պատճառով Հայաստանի հավաքականը բոյկոտեց Հնդկաստանի հետ երկրորդ մրցախաղը:
Կարդացեք նաև
Աշոտ ՀԱԿՈԲՅԱՆ
