Շատ ընտանիքներ ունեն իրենց ամուսնության հոբելյանը տոնելու հետ կապված ավանդույթներ: Հոգեբանները և ամուսնական հարաբերությունների փորձագետները նշում են, որ սրանք ամենևին էլ, այսպես ասած, ռոմանտիկ, շատ դեպքերում, ինչպես ընդունված է կարծել, ձևական արարողություններ չեն, այլ դրանք իրականում ամրացնում են ամուսնական, ընտանեկան հարաբերությունները, նաև նոր շունչ հաղորդում ամուսնական կյանքին: Նոր շունչ հաղորդելը թերևս կարևոր է տևական ժամանակ ամուսնացած զույգի համար:
Ամուսնական հոբելյանական տարիներն իրենց անվանումներն ունեն: Հարսանիքի օրը համարվում է Կանաչ հարսանիք: Հնուց ի վեր նշվում է ամուսնության առաջին տարեդարձը: Այն կոչվում է «Չթե հարսանիք»: «Չթե հարսանիք» խոսքերը կապակցվում են երիտասարդ, ուրախ, նորաստեղծ ընտանիքի, ոչ հանդիսավոր հասկացությունների հետ: Ամուսնության երկրորդ տարին նշվում է Թղթե հարսանիքը: Հիմնականում սա բացատրվում է նրանով, որ ամուսիններն արդեն անցել են փորձությունների մեծ շարան, սակայն, հարաբերությունները դեռ լիովին ամուր չեն: Որոշ երկրներում գոյություն ունի հետաքրքիր ավանդույթ` ամուսինները դիմավորում են հյուրերին թղթե հագուստով:
Ամուսնական երրորդ տարին անվանվում է կաշվե հարսանիքը: Ասում են, ավանդույթի համաձայն, ամուսինները պետք է ներեն բոլոր անցած վիրավորանքները, ազատվեն այն հին իրերից, որոնք կարող են հիշեցնել վեճերի մասին:
Ընտանեկան չորրորդ տարին անվանվում է Վուշե կամ Քաթանե հարսանիք:
Կարդացեք նաև
Ամուսնության 5-րդ տարում զույգը նշում է իր Փայտե հարսանիքը, 7-րդ տարում՝ Պղնձե հարսանիքը: 6-ամյակը համեմատում են չուգունի հետ: Ամուսնության 10-րդ տարում նշվում է Վարդե հարսանիքը:
11-ամյակը համարվում է Արճիճե կամ Վարդագույն հարսանիք: Այն նշում են որպես հարսանիքից հետո ամենակարևոր իրադարձություններից մեկը: Սա նոր մի փուլ է, երբ, երկար ճանապարհ անցնելուց հետո, արվում են եզրակացություններ, վերագնահատում են միասին անցած ուղին: Ամուսնության 15-րդ տարում նշում են Ապակե հարսանիքը, 20-րդ տարում՝ Ճենապակե հարսանիքը, 25-րդ տարում՝ Արծաթե, 30-ում՝ Մարգարտյա, 40-ում՝ Ռուբինե, իսկ 50-ում՝ Ոսկե հարսանիքը:
Միայն հիացմունքի կարող են արժանանալ այն զույգերը, որոնց հաջողվում է նշել իրենց ամուսնության 60-րդ՝ Պլատինե և 75-րդ՝ Ադամանդե հոբելյանները:
Ամուսնական հոբելյանները՝ ըստ անվանումների
1-ամյակ` ՉԹԵ հարսանիք,
2-ամյակ՝ ԹՂԹԵ հարսանիք,
3-ամյակ՝ ԿԱՇՎԵ հարսանիք,
4-ամյակ՝ ՔԱԹԱՆԵ, ՎՈՒՇԵ հարսանիք,
5 -ամյակ` ՓԱՅՏԵ հարսանիք,
6 -ամյակ` ԹՈՒՋԵ (ՉՈւԳՈՒՆ) հարսանիք,
7-ամյակ` ՊՂՆՁԵ հարսանիք,
8-ամյակ` ԹԻԹԵՂՅԱ հարսանիք,
9-ամյակ` ՀԱԽՃԱՊԱԿՅԱ հարսանիք,
10 -ամյակ` ՎԱՐԴԵ հարսանիք,
11-ամյակ` ՎԱՐԴԱԳՈՒՅՆ հարսանիք,
12-ամյակ` ՆԻԿԵԼԵ հարսանիք,
13 -ամյակ` ԺԱՆՅԱԿԵ հարսանիք,
14 -ամյակ` ԱԳԱԹԵ հարսանիք,
15-ամյակ` ԱՊԱԿԵ հարսանիք,
20 -ամյակ` ՃԵՆԱՊԱԿԵ (ՖԱՐՖՈՐԵ) հարսանիք,
25 -ամյակ` ԱՐԾԱԹԵ հարսանիք,
30 -ամյակ` ՄԱՐԳԱՐՏՅԱ հարսանիք,
35 -ամյակ` ԿՏԱՎԵ, ՄԱՐՋԱՆԵ հարսանիք,
37,5-ամյակ` ԱԼՅՈՒՄԻՆԵ հարսանիք,
40-ամյակ` ՍՈՒՏԱԿԵ (ՌՈՒԲԻՆԵ) հարսանիք,
45 -ամյակ` ՇԱՓՅՈՒՂՅԱ (ՍԱՊՖԻՐԵ) հարսանիք,
50 -ամյակ` ՈՍԿԵ հարսանիք,
55 -ամյակ` ԶՄՐՈՒԽՏԵ հարսանիք,
60 -ամյակ` ԱԴԱՄԱՆԴԵ հարսանիք,
65 -ամյակ` ԵՐԿԱԹԵ հարսանիք,
67,5-ամյակ` ՔԱՐԵ հարսանիք,
70 –ամյակ՝ ԲԱՐԵԲԵՐ հարսանիք,
75-ամյակ` ՏԵՐՈՒՆԱԿԱՆ, ԹԱԳԱՎՈՐԱԿԱՆ հարսանիք,
100 -ամյակ` ԿԱՐՄԻՐ հարսանիք
Ինչպե՞ս նշել ամուսնական հոբելյանը
Մեկ այլ հաճույք ու հետաքրքրություն է, թե ինչպես եք նշում ձեր ամուսնության հոբելյանը: Կարևորը ոչ թե շքեղությունն ու փայլն է, այլ կրեատիվությունն ու այն, որ այդ օրը հիշեցնի ձեզ ու ձեր զուգընկերոջը ձեր հարաբերությունների, ձեր ավանդույթների և ամուսնական հիշողությունների մասին:
«Ռիդերս դայջեսթ» ամսագրի սյունակագիր Ռեյչըլ Սոկոլը զրուցել է տարբեր մասնագիտություններ ունեցող ամուսանական զույգերի հետ և պարզել, թե նրանք ինչ ամուսնական ավանդույթներ ունեն: Օրինակ՝ «Հաղորդակցությունն ամուսնության մեջ» բլոգի հեղինակներ Աշլի և Մարկուս Կուսիները պատմում են, որ իրենց ամուսնական ավանդույթներից է միասին խնձոր հավաքելու գնալը: Նրանց կարծիքով՝ միասին խնձոր հավաքելը, խնձորի հյութ պատրաստելն ու այն ըմպելը խորացնում է ամուսնական հարաբերությունները: Նրանք ամուսնական զույգերին խորհուրդ են տալիս թեկուզ, եթե օրվա ընթացքում ունեն միասին անցկացնելու համար 15 րոպե, այդ ընթացքում զբաղվեն երկուսի համար էլ հաճելի զբաղմունքով:
Մեկ այլ զույգ նշում է, որ հետաքրքիր տարբերակ է միասին խարույկ վառելը և այդպես նշելը ամուսնության հոբելյանը, տարբերակներից է նաև քաղաքից դուրս տուն վարձելն ու այդ օրը միասին անցկացնելը:
Կան զույգեր, որոնք միմյանց սիրային նամակներ են գրում, ամիսը մեկ անգամ կամ հենց ամուսնության հոբելյանի օրը ժամադրում իրենց կնոջը կամ ամուսնուն:
Օդապարիկով թռիչքը ևս կարող է լինել հետաքրքիր տարբերակ լինել ամուսնության հոբելյանը նշելու համար:
Ամենակարևորը, մասնագետները խորհուրդ են տալիս հիշել, որ դուք ձեր ամուսնության հոբելյանը նշում եք ոչ թե շրջապատի, այլ հենց ձեր ընտանիքի համար:
Տաթև ՀԱՐՈՒԹՅՈՒՆՅԱՆ
