Մորիս Թիյեի կյանքը լեցուն էր հակասություններով, նա ծնվել է Ռուսաստանում՝ Ուրալում, հռչակավոր դարձել ԱՄՆ-ում:
Մինչեւ 17 տարեկան Մորիսը հրեշտակային արտաքին ուներ, դրանից հետո սկսեց փոխվել:
Ըստ kulturologia-ի, ապագա Շրեկը 14 լեզու գիտեր, փայլուն կրթություն էր ստացել եւ երազում էր փաստաբան դառնալու մասին:
Նա ծնվել էր ֆրանսիացի ինժեների ընտանիքում:
Կարդացեք նաև
Հեղափոխությունից առաջ հայրը մահացավ, եւ ընտանիքը մի կերպ տեղափոխվեց Ֆրանսիա:
Բժիշկները Մորիսի մոտ հազվադեպ հանդիպող ակրոմեգալիա հիվանդությունն էին ախտորոշել, որի դեպքում աճի հորմոնների գերարտադրություն է սկսվում: Սկզբում պատանին ծանր էր տանում արտաքինի ոչ նորմալ փոփոխությունները, հետո հարմարվում: Հարցազրույցներից մեկում ասել է, որ տարեկիցներն իրեն կապիկի հետ էին համեմատում, ինչի պատճառով հաճախ էր առանձնանում բոլորից: Բացառիկ ընդունակություններով տղան ընդունվում է Թուլիզի համալսարանի իրավագիտության բաժին: Թվում էր, թե փաստաբան դառնալու երազանքը կկատարվի, սակայն տղայի մոտ ձայնալարերի խնդիրներ սկսվեցին:
Մորիսը այլեւս չէր վիրավորվում մարդկանցից, ամեն ինչին հումորով էր վերաբերվում, նա իր ժամանակի ամենաբարի հսկան էր: 1937թ. Սինգապուրում հայտնի ռեստլերներից մեկի հետ հանդիպելուց հետո Մորիսը որոշեց լրջորեն զբաղվել ձեռնամարտով, ինչը նրան հայտնի դարձրեց ոչ միայն մարզասերների, այլեւ ռեժիսորների համար: Նա իր արտաքինի հետ կապված խնդիրները վերածեց արժանիքների եւ հայտնի դարձավ որպես «ֆրանսիացի հրեշտակ»: Չնայած մեծ հռչակին, նա բավականին համեստ մարդ էր եւ ապրում էր իսկական կաթոլիկին բնորոշ ժուժկալությամբ ու աստվածավախությամբ: Նա 1947-ին նույնիսկ Վատիկանում Հռոմի պապին էր հանդիպել:
Հիվանդությունն ու լարված աշխատանքն աստիճանաբար հյուծում էին Մորիսին, եւ իր վերջին մարտը, որ կայացավ 1953-ին, անպարտելի եւ ուժեղ «ֆրանսիացի հրեշտակը» պարտվեց, իսկ մեկ տարի անց մահացավ սրտի կաթվածից:
Ըստ Ուիլյամ Սթեյգի գրքի նկարահանված «Շրեկ» ֆիլմի հերոսը շատ նման է Մորիս Թիյեին ոչ միայն արտաքինով, այլեւ բնավորությամբ, դա աչքի է զարնում, եւ հեղինակները չեն էլ հերքել: Ահա այսպիսին էր Շրեկի նախատիպը, որի մասին միայն դրական են խոսել ժամանակակիցները:
Պատրաստեց
ԳՈՀԱՐ ՀԱԿՈԲՅԱՆԸ
«Առավոտ» օրաթերթ
26.08.2020
