Aravot.am-ն այսօր ԱԱԾ-ից հետաքրքրվեց՝ ճի՞շտ են արդյոք մամուլում շրջանառվող այն տեղեկությունները, որ առողջապահության նախարար Արսեն Թորոսյանը կանչվել է ԱԱԾ: Ըստ այդ լուրերի, նախարար Թորոսյանն այսօր առավոտյան վարչապետ Նիկոլ Փաշինյանի հետ ունեցած միջադեպից հետո հրավիրվել է ԱԱԾ: Ըստ նույն լուրերի՝ Արսեն Թորոսյանը հրաժարականի դիմում է ներկայացրել:
Մեր հարցին ի պատասխան՝ ԱԱԾ մամուլի կենտրոնի ղեկավար Արթուր Գեւորգյանն ասաց՝ առողջապահության նախարար Արսեն Թորոսյանը ԱԱԾ չի կանչվել, նախարարին ԱԱԾ կանչելու որեւէ հիմք չկա:
Արդյոք վիճե՞լ են Նիկոլ Փաշինյանն ու պարոն Թորոսյանը եւ ի՞նչ պատճառով, այս հարցերի պատասխանը մեզ չհաջողվեց ստանալ, քանի որ վարչապետի մամուլի խոսնակ Մանե Գեւորգյանը մեր հեռախոսազանգերին չպատասխանեց: Չնայած՝ ավելի վաղ, 168.am–ի հետ զրույցում, Մանե Գեւորգյանն այս լուրն էլ էր հերքել՝ նշելով, որ դրանք բամբասանքներ են, եւ չի ցանկանում մեկնաբանել:
Aravot.am-ը հրաժարականի մասին հարց ուղղեց առողջապահության նախարարի մամուլի քարտուղար Ալինա Նիկողոսյանին. «Ինչ վերաբերում է հրաժարականին, ապա այդ լուրերը հերքում եմ, նախարարն այս պահին գտնվում է աշխատանքի մեջ»:
Ալինա Նիկողոսյանն ասաց, որ վարչապետի որոշմամբ՝ նախարարը արձակուրդ է գնալու օգոստոսի 31-ից մինչեւ սեպտեմբերի 18-ը:
Լուսինե ԲՈՒԴԱՂՅԱՆ
