Երեւան քաղաքում բնակվող ամուսինները, որոնք մեկամյա երեխայի առք ու վաճառքի գործով մեղադրյալ են, ազատ են արձակվել, նրանց նկատմամբ ընտրվել է ստորագրություն չհեռանալու մասին խափանման միջոցը:
Հիշեցնենք, որ 13.05.2020թ. Մասիս քաղաքի բնակչուհին հաղորդում էր տվել Ոստիկանության Մասիսի բաժնում, որ իր որդուն 500.000 ՀՀ դրամ գումարի դիմաց վաճառել է Երևան քաղաքում բնակվող ամուսիններին, սակայն վերջիններս մաս-մաս վճարել են ընդամենը 300.000 ՀՀ դրամ: Դեպքի առթիվ հարուցվել է Քրեական գործ ՝ Քրեական օրենսգրքի 168 հոդվածի առաջին մասով (Խնամքը ստանձնելու նպատակով երեխայի առքի կամ վաճառքի համար):
Երեխային գնելու համար մեղադրվողի պաշտպան Հայկ Ապրեսյանը Aravot.am-ին ասաց, որ նախաքննություն է կատարվում՝ պարզելու երեխայի կենսաբանական հայրը հանդիսանում է մեղադրվող տղամարդը, թե՝ ոչ:
Ըստ մեր զրուցակցի, նշված տղամարդը հենց երեխայի կենսաբանական հայրն է, որը պնդում է, որ երեխայի համար ոչ մի գումար չի վճարել: Փաստաբանը նաեւ հայտնեց, որ հաղորդում տված կինն էլ երեխայի կենսաբանական մայրն է. «Անհարմար է ասել, բայց այդ կինն այնքան էլ ադեկվատ չէ. ինքը ամեն ինչ կարող է ասել, նախաքննությունը ցույց կտա»:
Կարդացեք նաև
Մեկ տարեկան երեխան մի քանի ամիս է՝ ինչ փոխանցվել է հորը, մեր հարցին, թե ինչու է մի քանի ամիս առաջ փոխանցվել հորը, փաստաբանը պատասխանեց՝ նախաքննական գաղտնիք է:
Արփինե ՍԻՄՈՆՅԱՆ
