«Քանի որ նա զինծառայող է, իրեն վերաբերվելու են բավականին կոշտ, որովհետե նրան կդիտարկեն ոչ թե որպես մոլորված խաղաղ բնակիչ, այլ զինվորական: Նա Ադրբեջանում գտնվում է զինգերու կարգավիճակում, այսինքն՝ նրա վրա տարածվում է ժնեւյան 3-րդ կոնվենցիան»-Aravot.am-ի հետ զրույցում ասաց ՀՀ առաջին օմբուդսման, «Ընդդեմ իրավական կամայականության» հ/կ գործադիր տնօրեն, իրավապաշտպան Լարիսա Ալավերդյանը՝ անդրադառնալով այն փաստին, որ հայ սպա Գուրգեն Ալավերդյանը մոլորվել եւ հայտնվել է Ադրբեջանում:
Հիշեցնենք, որ օգոստոսի 22-ին, ինչպես ՊՆ-ն է հաղորդել, Գուրգեն Ալավերդյանը մոլորվել էր եւ հայտնվել Ադրբեջանի տարածքում: Վերջինիս զինծառայողները հայ սպայի մասնակցությամբ նվաստացուցիչ տեսարաներով եւ վերաբերմունքով, էթնիկ վիրավորանքներ եւ հայհոյանքներ պարունակող տեսանյութ են հրապարակել՝ նրան ներկայացնելով իբրեւ դիվերսիոն խմբի ղեկավար, մինչդեռ, ինչպես ՊՆ-ն է հայտնել, դա ապատեղեկատվություն է. Գուրգեն Ալավերդյանը մոլորվել է խիստ անբարենպաստ եղանակային պայմանների պատճառով:
«Նման վերաբերմունքը կոպիտ խախտումների մասին է խոսում: Նշյալ կոնվենցիան սահմանում է նորմ, որը չկա մարդու իրավունքներին առնչվող այլ միջազգային պայմանագրերում, եւ, ըստ որի, անձը պետք է պաշտպանված լինի ամբոխի հետաքրքրասիրությունից: Համապատասխան կոնվենցիան ասում է՝ ամենաշատը, որը կարող են հարցնել զինգերուն, դա նրա անձը հաստատող տվյալներն են, իսկ վերաբերմունքը պետք է լինի արժանապատվությունը հարգող. արժանապատվությունը եւ անձը նսեմացնող վերաբերմունքը պետք է բացառվի: Մյուս կողմից, Ադրբեջանն ունի պարտավորություն՝ հնարավորինս արագ ապահովելու որեւէ միջազգային կազմակերպության, տվյալ դեպքում՝ Կարմիր խաչի մուտքը»,-մեկնաբանելով նշյալ տեսանյութը՝ շեշտեց Լարիսա Ալավերդյանը: Նրա խոսքով՝ նման վերաբերմունքը մարդու իրավունքների կոպիտ ոտնահարում է առհասարակ եւ միջազգային մարդասիրական իրավունքի, մասնավորապես՝ ժնեւյան 3-րդ կոնվենցիայի խախտում: Հիշեցնենք, որ Կարմիր խաչի հայաստանյան գրասենյակը համապատասխան աշխատանք է իրականացնում:
Լուիզա ՍՈՒՔԻԱՍՅԱՆ
Կարդացեք նաև
