Յուրահատուկ ցուցահանդեսին նա կներկայացնի բացառիկ ֆոտոհուշեր
Սուպերմոդել Կլաուդիա Շիֆերը, որպես համադրող, պատրաստվում է իր առաջին ցուցահանդեսին՝ «Fashion-1990-ականների լուսանկարներ» խորագրով:
Այս ցուցահանդեսը նա որակել է իր անձնական ճանապարհորդությունը՝ նորաձեւության աշխարհ:
Այս մասին տեղեկացնում է The art newspaper Russia-ն:
Լուսանկարիչների թվում, որոնց աշխատանքները կներկայացվեն դյուսելդորֆյան Կունստպալաստ թանգարանում, կլինեն նաեւ Յուրգեն Թելլերը, Կորին Դեյը, Կարլ Լագերֆելդը, Հերբ Ռիտցը եւ Էլեն ֆոն Ունվերտը:
Կարդացեք նաև
Ցուցադրվող լուսանկարներին Շիֆերը կհավելի նաեւ իր անձնական արխիվից նմուշները, իրեն պատկերող լուսանկարներ, որոնք արվել են նորաձեւության աշխարհի տարբեր ամսագրերի համար:
Այդպիսով էքսպոզիցիան բաղկացած կլինի 120 ցուցանմուշներից՝ կապված 1990-ականների դիզայներների, լուսանկարիչների, խմբագիրների եւ ֆոտոմոդելների հետ:
«Ես սիրահարվեցի նորաձեւությանը 1980-ականներին, սակայն միայն 1990-ականներին հասկացա, թե այն ինչ է իրենից ներկայացնում: Դա էներգիայով լեցուն հրաշալի ժամանակաշրջան էր, որը նման չէր այն տարիներին, ինչով զբաղվել էինք նախկինում: Ֆոտոսեսիաները կարող էին ձգվել օրերով, իսկ նորաձեւության մասին հոդվածների վերնագրերը շաբաթներով «փողփողալ» լրատվամիջոցներում: Ես եւ այլ ֆոտոմոդելներ ապրել ենք այդ միջավայրում, շնչել դրա օդը ու գիտակցել, որ ի վիճակի ենք ինչ-որ բան փոխել աշխարհում»,-ասել է Կլաուդիա Շիֆերը:
Հավելենք, որ սուպերմոդելը ծնվել է Գերմանիայում, այժմ, սակայն, բնակվում է Մեծ Բրիտանիայում: Շիֆերը հայտնվել է ավելի քան 1000 ամսագրերի շապիկներին եւ այժմ էլ շարունակում է մեծացնել այդ թիվը: 2002 թվականին Forbes-ը նրա ունեցվածքը գնահատել է 55 միլիոն ԱՄՆ դոլար։ Նա նկարահանվել է մի քանի ֆիլմում, զբաղվում է բարեգործությամբ եւ ՅՈՒՆԻՍԵՖ-ի բարի կամքի դեսպան է:
Գոհար ՀԱԿՈԲՅԱՆ
«Առավոտ» օրաթերթ
22.08.2020
