«Տեղական ընտրությունների կարևորությունը դեռևս հանրության կողմից շատ չի ընկալվում, ցավոք սրտի»,- «Մեդիա կենտրոն»-ի կազմակերպած քննարկման ընթացքում ասաց Սահմանադրական բարեփոխումների մասնագիտական հանձնաժողովի անդամ Դանիել Իոաննիսյանը։
Նա ընդգծեց, որ նույն իրավիճակն է դպրոցական ծրագրերում, սակայն դրանք ևս փոխվելու են․ «Փոխվելու են դեպի լավը, դեպի ավելի շուտ այդ ամենը սովորելը։ Այսինքն՝ օրինակ, այն գիտելիքները, որոնք այժմ ստանում են, ենթադրենք, ժողովրդավարության հետ կապված, աշակերտները մինչև 16 տարեկան։ Ապա, նախարարությանը առաջարկած ծրագրերով այդ գիտելիքները ստանալու են մինչև 15 տարեկանը, այսինքն՝ էլ ավելի շուտ են ստանալու։ Բայց որ նայում ես այդ ծրագրերը՝ շատ քիչ անդրադարձ կա տեղական ինքնակառավարմանը։ Այսինքն՝ հիմնականում ընդհանուր ժողովրդավարությանը, մարդու իրավունքներին, բազմակուսակցական համակարգին, այսինքն՝ ավելի շատ համապետական խնդիրներին կամ այն խնդիրներին, որոնք համապետական ընկալում ունեն»։
Դանիել Իոաննիսյանը կարևորում է, որ «Հասարակագիտություն» առարկայի ծրագրերը ավելի խորը և համապարփակ լինեն, և դրա ուսուցմանը ավելի շատ ժամեր հատկացվեն․ «Դա շատ կարևոր նշանակություն ունի հանրության ձևավորման վրա, որ քաղաքացիները իմանան, թե առնվազն որ պահանջը ում ներկայացնեն, ցույց չանեն, չփակեն Երևան-Էջմիածին ճանապարհը և պահանջեն վարչապետից, որ պարտադրի դատավորին այս կամ այն որոշումը կայացնել»։
Կարդացեք նաև
Ամի ՉԻՉԱԿՅԱՆ
