Aravot.am-ը Հայաստանի պետական ագրարային համալսարանի ռեկտոր Վարդան Ուռուտյանին խնդրեց մեկնաբանել մամուլում հրապարակված այն տեղեկությունը, որ քրեական գործ է հարուցվել՝ իր կողմից պաշտոնեական լիազորությունները չարաշահելու հատկանիշներով:
Ագրարային համալսարանի ռեկտորը հայտնեց, որ տարածված լուրն իրականությանը չի համապատասխանում: «Ինձ եւ որեւէ մեկին որեւէ մեղադրանք չի առաջադրվել»,-շեշտեց նա: Ապա հավելեց. «Հին պնդումներ էին, որոնք ես վաղուց հերքել եմ: Ես ընտրվել եմ հոգաբարձուների խորհրդի կողմից եւ ոչ թե նշանակվել: Սա իմ անձի վարկաբեկման փորձ է. ագրարային համալսարանի նախկին աշխատակիցներից մեկի բողոքի հիման վրա գործ է հարուցվել, եւ նախաքննություն է ընթանում: Վստահ եմ, որ այն կտա ամեն ինչի պատասխանը, այդ թվում՝ սուտ մատնության: Իհարկե, նախաքննության գաղտնիքը հաշվի առնելով՝ համալսարանը մանրամասներ չի ներկայացնում: Միայն կարող եմ վստահեցնել, որ մեզ մոտ կյանքն ընթանում է բնականոն հունով: Մենք տասնամյակներով չլուծված խնդիրներ ենք վերհանում եւ լուծում, պատրաստվում ենք սեպտեմբերի 1-ին»:
Վարդան Ուռուտյանն ասաց, որ չգիտի, թե որն է պատճառը, որ վերջին շրջանում իր անունը հոլովվում է նման համատեքստում, ապա հավելեց. «Մարդիկ իրավունք ունեն բողոքելու, բայց ոչ թե անհիմն փաստեր եւ ապատեղեկատվություն տարածելու»:
Նաեւ հետաքրքրվեցինք՝ այս տարի ինչքանո՞վ է կրճատվել ուսանողների թիվը՝ նախորդ տարվա համեմատությամբ: «Բավականին շատ էին թափուր տեղերը, բայց մեզ մոտ տեսեք, թե ինչ է տեղի ունեցել: Առաջին անգամ ագրարային համալսարան ընդունելությունն իրականացվեց քննությունով, մինչդեռ նախկինում որոշ մասնագիտությունների գծով ընդունվում էին ատեստատի գնահատականների հիման վրա: Այս տարի առաջին անգամ այդ համակարգը ներդրվեց, որ պետք է քննությունով ընդունվեն, դա համընկավ կորոնավիրուսի հետ, հետո կառավարության համապատասխան հայտարարությունը եղավ:
Կարդացեք նաև
Դեկտեմբերին եղավ հայտարարություն, որ Ագրարային համալսարանում ընդունելությունը քննությամբ է, եւ դա, բնականաբար, ազդեց որոշ ուսանողների վրա; Մարդիկ, որոնք գիտեին, թե ատեստատով են գալու, չհասցրին պարապել, մենք ունեցանք բավականին անկում: Ընդունվել է 85 ուսանող, բայց կարծում եմ, որ սրանք այն ուսանողներն են, որոնք գիտեն, թե ուր են եկել, ինչի համար են եկել եւ քննություն են հանձնել՝ նպատակ ունենալով կարիերա անել գյուղատնտեսության մեջ: Այսինքն` որակի առումով բավականին մեծ փոփոխություն կունենանք:
Իհարկե, մեծ հետաքրքրություն կա մագիստրոսական ծրագրերի առումով, կարճաժամկետ դասընթացների, կառավարության սուբսիդավորվող ծրագրերի շրջանակում մեծ վերապատրաստումներ ենք անում ֆերմերերին, տնտեսվարողներին, այնպես որ՝ ամեն ինչ բնականոն հունով է ընթանում»:
Գոհար ՀԱԿՈԲՅԱՆ
Վարդան Ուռուտյանի լուսանկարը՝ Ագրարային համալսարանի կայքից
