«Տարեսկզբին, երբ Նիկոլ Փաշինյանը Կապանում ասուլիսի ժամանակ անդրադարձավ հարցին՝ շարունակո՞ւմ է 2016թ.-ին հայտնած դիրքորոշումը, որ ապրիլյան ռազմական գործողությունները տեղի են ունեցել Ռուսաստանի իմացությամբ եւ թույլտվությամբ, պահպանել, ասաց, որ ինչ ասել է, մնում է նույնը, եւ քննարկում է ունեցել ՌԴ-ի գործընկերների հետ: Ի՞նչ պատասխաններ են տրվել նրան»,-երրորդ նախագահ Սերժ Սարգսյանին այսօր նման հարցադրում հղեց լրագրողներից մեկը: Սերժ Սարգսյանը նախ նկատեց, որ հարցի հասցեատերն ինքը չէ, ապա նշեց. «Ինչ վերաբերում է գաղափարին, ապա կարծում եմ, որ նման հայտարարությունները քաղաքական տեսանկյունից տգիտություն են: Գիտեք, երբ մարդիկ վարկաբեկող, չստուգված տեսակետներ են հայտնում դաշնակիցների վերաբերյալ, դա ունենում է շատ խորը հետեւանքներ եւ ոչ միայն այդ պահին»:
Սարգսյանն ընդգծեց. «Ռուսաստանը մեր ռազմավարական դաշնակիցն է, եւ նման հայտարարությունը նշանակում է քո դաշնակցին մեղադրել պատերազմ հրահրելու, այսինքն՝ դավաճանության մեջ: Դա անթույլատրելի է՝ հատկապես այն պարագայում, երբ ՌԴ-ն մեզ հսկայական օժանդակություն է ցուցաբերել որպես դաշնակից»: Ապա` Սերժ Սարգսյանը հայտնեց, որ մինչեւ ապրիլյան ռազմական գործողությունները Հայաստանը ՌԴ-ից ստացել է 50 000 տոննայի ռազմատեխնիկական օժանդակություն, որի համար չի վճարել. դրա մեջ չեն մտնում «Իսկանդեր»-ը, «Տոկչա ՈՒ»-ն, 200 միլիոն դոլարի պայմանագրի սպառազինությունը: Նման պարագայում խոսել այն մասին, որ Ռուսաստանի գիտությամբ եւ հրահրմամբ է եղել ապրիլյանը, սխալի արդյունք է: Չի կարելի նման հայտարարություն անել: Որեւէ մեկը չունի «Իսկանդեր», բացի Հայաստանից, սա դաշնակցի վերաբերմունք չէ՞… նաեւ «Իսկանդերի» առկայությունն էր պատճառը, որ ապրիլին խոշորամասշտաբ պատերազմ չեղավ»:
Լուիզա ՍՈՒՔԻԱՍՅԱՆ
