«Միակ երկիրը Թուրքիան էր, որը չդատապարտեց Ադրբեջանի ռազմական գործողություններ սկսելը, այսինքն՝ Թուրքիան մինչեւ այդ պահն անվերապահորեն ընդունում էր այն, ինչ շահավետ է Ադրբեջանին»,-լրագրողների հետ զրույցում այսօր անդրադառնալով ապրիլյան ռազմական գործողություններում Թուրքիայի հնարավոր դերակատարմանը՝ ասաց երրորդ նախագահ Սերժ Սարգսյանը:
«Չեմ բացառում, որ իրենց գործողությունները մինչեւ այդտեղ հստակ համաձայնեցվում էին, բայց դժվարանում եմ ասել՝ թուրք զինվորականները մասնակցե՞լ են ապրիլյանի օպերացիայի նախապատրաստմանը: Բայց որ ռազմական գործողությունների օրերին եւ նախորդ օրերին Ադրբեջանում ոչ միայն Թուրքիայից կային մասնագետներ եւ հրահանգիչներ, միանշանակ է: Հաստատված փաստեր ունենք, որ թուրք եւ իսրայելցի մասնագետներն այդ ժամանակահատվածում Ադրբեջանում էին»,-նշեց Սերժ Սարգսյանը:
Լուիզա ՍՈՒՔԻԱՍՅԱՆ
