ԿԳՄՍ նախարար Արայիկ Հարությունյանն իր ֆեյսբուքյան էջում գրել էր, որ սեպտեմբերի 15-ից դասերը կվերսկսվեն հանրակրթական դպրոցներում, նախնական և միջին մասնագիտական հաստատություններում, երաժշտական, արվեստի, գեղարվեստի դպրոցներում՝ առկա ուսուցմամբ և սանիտարահիգիենիկ կանոնների պահպանմամբ, ավելի ուշ Ազատություն ռ/կ-ին նախարարը հայտնել էր, որ աշակերտներն ու ուսանողները դասի կնստեն դիմակներով, դպրոցներում դասերն առավելագույնը 20 աշակերտով կանցկացվեն: Նա նաեւ ուսանողներին եւ աշակերտներին կոչ էր արել ինքնամեկուսանալ մինչեւ դասերի սկսվելը:
Аravot.am-ը բժշկական գիտությունների դոկտոր, պրոֆեսոր Գարիկ Աղաբեկյանից հետաքրքրվեց՝ արդյոք 4 եւ ավելի ժամեր փակ տարածքում դիմակներով գտնվելը վտանգավոր չի՞ լինի աշակերտների առողջության համար: Պարոն Աղաբեկյանն ասաց, որ դասերը միանշանակ ճիշտ է սկսելը, որովհետեւ այլընտրանք չկա, եւ կրթությունն առանց այն էլ տուժել է համավարակի պատճառով:
Ինչ վերաբերվում է փակ տարածքում երեխաների՝ երկար ժամանակ դիմակներով գտնվելուն, այս մասին էլ պրոֆեսորը նշեց. «Ո՞նց են պատկերացնում՝ առաջին դասարանի երեխան 4 ժամ նստի դիմակով: Նախ 3-4 ժամ հետո դիմակի տակ դու երեք անգամ ավելի պակաս թթվածին ես շնչում, եւ քո արտադրած ածխաթթու գազը, ըստ ամերիկացի մասնագետների, 70 %-ով ավելանում է: Հետո երեխաներն ինչպե՞ս են սոցիալական հեռավորություն պահպանելու, ասենք՝ դասի ժամանակ ուսուցիչն այդ հարցը կարգավորեց, ինչպե՞ս է դա կարգավորելու դասամիջոցին: Խեղճ ուսուցիչը հո չի կարող բոլորի հետեւից վազել ու հետեւել, որ իրար հետ չխաղան, իրար չբռնեն, չգրկեն, չվազվզեն: Դա հնարավոր չէ վերահսկել:
Երեխաները ձեռք են տալու գրատախտակին, պատերին, սեղանին, աստիճանավանդակին, կավիճին, դռան բռնակներին, ո՞նց են վարվելու, երեխաներին ասելու են՝ եթե մեկը ձեռք է տվել, մյուսը ձեռք չտա՞: Երեխաները դասամիջոցներին է՞լ են դիմակներով լինելու, ինչպես են զուգարանից օտվելու…»:
Կարդացեք նաև
Նա փաստում է, որ շատ դպրոցներում, հատկապես կենտրոնում գտնվող, քառասուն երեխա կա ամեն դասարանում, ու մի քանի հերթով դասեր անելու դեպքում էլ ծնողների համար են խնդիրներ առաջանալու. «Դա շատ դժվար հարց է նաեւ իշխանությունների համար, բայց ես կարծում եմ, որ դպրոցները պետք է նորմալ ձեւով աշխատեն՝ առանց դիմակի: Թող ալկոգել դնեն, երեխաները ձեռքերը շփեն, նույն էլ դասամիջոցից հետո՝ դասասենյակ մտնելից: Դպրոցներում պետք է պարտադիր բժիշկներ լինեն, ուսուցիչները պետք է աչալուրջ լինեն, որ եթե որեւէ երեխա վատ զգա, անմիջապես բժշկի դիմեն եւ տեղեկացնեն ծնողին: Դպրոցներ ներս մտնելիս պետք է պարտադիր ջերմաչափում անել»:
Գարիկ Աղաբեկյանը բուհերին էլ անդրադարձավ, մասնավորապես՝ բժշկական համալսարանին. «Որքանով տեղյակ եմ, ԿԳՄՍ նախարարությունը թողել է բուհերի հայեցողությանը՝ դասերը օնլայն կամ առկա անցկացնելը: Օրինակ՝ բժշկական համալսարանն ինչքա՞ն կարող է օնլայն դասեր անցկացնել; Բժշկականի ուսանողը պետք է հիվանդ տեսնի, հիվանդանոց գնա պրակտիկայի: Հո կլինիկայից վիրահատություններին օնլայն չե՞ն հետեւելու»:
Գոհար ՀԱԿՈԲՅԱՆ
Լուսանկարը՝ Գարիկ Աղաբեկյանի ֆեյսբուքյան էջից
