Լրագրողներն այսօր ՀՀ երրորդ նախագահ Սերժ Սարգսյանի հետ հանդիպմանը նրանից հետաքրքրվեցին՝ եթե ինքը լիներ վարչապետ Նիկոլ Փաշինյանի փոխարեն, ինչպե՞ս կպատասխաներ BBC-ի հաղորդավարի այն հարցին, թե «պատրա՞ստ եք ներողություն խնդրել Ադրբեջանից՝ Հայաստանի ռազմական հանցագործությունների համար»:
Սերժ Սարգսյանը պատասխանեց. «Ինչո՞ւ ներողություն խնդրենք, այն բանի համար, որ հետեւելով օրենքի տառին՝ փորձում էինք խաղաղ ճանապարհո՞վ իրականացնել ինքնորոշման իրավունքը: Իսկ նրանք հրոսակախմբեր ուղարկեցին մեր վրա: Այն բանի համար, որ իրենց կրակակետերը տեղադրել էին բնակավայրերո՞ւմ՝ հրետակոծելով խաղաղ բնակչությանը: 92թ.-ին օր է եղել, որ Ստեփանակերտի վրա մինչեւ երեք հարյուր հիսուն արկ ու հրթիռ է ընկել: Ա՞յդ բանի համար ներողություն խնդրեինք: Ես եւ մարտական ընկերներս ներողություն խնդրելու կոմպլեքս չունենք, բայց դրա համար հիմք է պետք, մենք ամաչելու ոչինչ չունենք: Կամաչեինք, եթե չդիմադրեինք, եթե հավաքվեինք Երեւանում եւ սկսեինք Ստեփանակերտ-Ստեփանակերտ երգել: Ադրբեջանից ներողություն խնդրելու ոչ մի առիթ չունենք»:
Լուիզա ՍՈՒՔԻԱՍՅԱՆ
