Պետեկամուտների կոմիտեն մոտ 1.4 միլիարդ դրամի չափով հարկային նոր պարտավորություններ է ներկայացրել ԲՀԿ խմբակցության ղեկավար, գործարար Գագիկ Ծառուկյանի ընտանիքին պատկանող «Օնիրա քլաբ» ընկերությանը։ Այդ մասին տեղեկանում ենք հրապարակային ծանուցումների «Ազդարար» համակարգից։
Լրացուցիչ հարկային պարտավորություններ գանձելու վերաբերյալ վարույթն սկսվել է հունիսի 20-ին։ Հուլիսի 20-ին ՊԵԿ իրավաբանական վարչության պետ Արման Մնացականյանը որոշել է 1 միլիարդ 379 միլիոն դրամի չափով գումար գանձել «Օնիրա քլաբից». այս գումարի մեծ մասը գոյացել է չվճարած պետական տուրքից, մի փոքր մասն էլ՝ տույժերից։
Գագիկ Ծառուկյանի փաստաբաններից Սմբատ Մինասյանը «Լուրեր»-ին հայտնեց, որ ՊԵԿ-ի ակտը վարչական դատարանում բողոքարկելու գործընթաց են սկսել։ «Դատալեքս» տեղեկատվական հարթակում, սակայն, այս բողոքարկման վերաբերյալ տեղեկություններ չկան։
«Լուրեր»-ը Սմբատ Մինասյանին մի քանի հարց է ուղղել:
Կարդացեք նաև
– 1.4 միլիարդը հենց լիցենզիայի գումարն է, որը չի վճարվել։ Բողոքարկելու ենք ՊԵԿ-ի այդ ակտը` կապված և՛ այդ պարտավորության հետ, և՛ խաղատանը լիցենզիայից զրկելու հետ։ Խաղատան լիցենզիայի ամսական գումարը 400 միլիոն դրամից ավելի գումար է, ու երեք ամսվա վճարի մասին է խոսքը։
– Իսկ ինչո՞ւ «Օնիրա քլաբը» չի վճարել։
– Խնդիրն այն է, որ արտակարգ դրության ժամանակ, պանդեմիայով պայմանավորված, խաղատունը չի աշխատել, դիմել էին, որ հարկային պարտավորությունը տարաժամկետեք։ ՊԵԿ-ն էլ, երևի հաշվի առնելով Ծառուկյանի շուրջ էս ամբողջ կատարվողը, որոշել է, որ, չէ, պիտի վճարվի, մենք էլ դատական կարգով վիճարկել ենք, ու հույս ունեմ` դատարանը օբյեկտիվ կլինի։
– Ըստ որոշման՝ «Օնիրա քլաբին» հրավիրել են վարչական վարույթի նյութերին ծանոթանալու, կարծիք հայտնելու և այլն։ Ընկերությունը, սակայն, չի մասնակցել։ Ինչո՞ւ։
– Հինգ օր առաջ չպե՞տք է հայտնեն։ Եթե, օրինակ «Ազդարար»-ում տեղադրում են ու ասում՝ 15 րոպեից պիտի գաս, վարույթի մասնակցեք, ըստ Ձեզ, դա տրամաբանակա՞ն է։ Կամ ենթադրենք՝ հենց այդ օրը «Օնիրա քլաբն» այլ տեղում այլ վարույթի է մասնակցում, ի՞նչ է լինելու։
Մկրտիչ ԿԱՐԱՊԵՏՅԱՆ
Հոդվածն ամբողջությամբ՝ սկզբնաղբյուր կայքում:
