Վարչապետ Նիկոլ Փաշինյանն այսօր Գեղարքունիքի մարզում սուբվենցիոն ծրագրերով կատարվող շինարարական աշխատանքներին ծանոթանալիս Ծովասար համայնքում մանկապարտեզի շենքը կառուցող շինարարներից հետաքրքրվեց՝ նորմալ վարձատրվո՞ւմ են:
Ի պատասխան, շինարարներն ասացին՝ նորմալ է՝ 250 հազար դրամ ստանում են: Վարչապետը հարցրեց՝ որ Ռուսաստան եք գնում ինչքա՞ն եք ստանում:
«Ռուսաստանն ուրիշ է, 70-80 հազար ռուբլի ստանում ենք»,-պատասխանեցին շինարարները: Մարզի իշխանությունները Նիկոլ Փաշինյանին պարզաբանեցին, որ 500 հազար դրամին համարժեք է: Փաշինյանն ասաց, որ հույս ունեն, որ Հայաստանում էլ ավելի շատ կվճարեն, քանի որ շուտով գործերը շատանալու են եւ աշխատուժի պահանջարկ է լինելու:
«Բայց 250 հազար դրամը վատ չի էլի՞»,-նկատեց վարչապետը: «Վատ չի, որ իրիկունը երեխաներին գրկում ենք»,-պատասխանեց շինարարներից մեկը:
Վարչապետին ուղեկցող պաշտոնյաները նշեցին, որ Ծովասար համայնքն առաջին անգամ մանկապարտեզ կունենա: Նիկոլ Փաշինյանը հարցուփորձ արեց՝ իսկ գույքը կա՞: Գեղարքունիքի մարզպետ Գնել Սանոսյանն ասաց, որ բարերարներ կան, որ խոստացել են գույքը տրամադրել:
Շինարարները նույնպես Ծովասար համայնքից էին:
Կարդացեք նաև
Մանկապարտեզի շենքից դուրս գալիս վարչապետի ճանապարհը կտրեց Հրաչիկ անունով մի քաղաքացի, որը ներկայացավ որպես ազատամարտիկ: Ասաց, որ 30 նամակ է գրել մարզպետին, կառավարություն, սակայն ոչ մի դրական պատասխան չի ստացել: Մարզպետն ասաց, որ ծանոթ է խնդրին, ապա վարչապետին ներկայացրեց, որ բնակիչը գյուղից մեկ կիլոմետր հեռու է իր տունը սարքել եւ պահանջում է տունը ջուր ու գազ քաշել:
Վարչապետը հետաքրքրվեց՝ ինչո՞ւ եք տունն այդքան հեռու կառուցել: Հրաչիկ Վարդանյանն ասաց, որ գյուղապետն է այդպես որոշել:
«Մեր խնդիրը գիտե՞ք որն է, որ գյուղից հեռու տուն ենք սարքում, հետո ասում ենք՝ մարզպետ դե արի հոսանքը քաշի, ջուրը քաշի»,-նկատեց Նիկոլ Փաշինյանը:
Բնակիչն ասաց, որ հողը բաժանելիս ինքը պատերազմի դաշտում է եղել եւ, եթե չեն ապահովելու ենթակառուցվածքները, թող իրեն հատկացնեն գյուղում առկա մի շենքից տարածք, որտեղ ե՛ւ ջուրը կա ե՛ւ գազը ե՛ւ՝ լույսը: Մարզպետն ասաց, որ այս տարի չեն կարող այդ խնդիրը լուծել, քանի որ մի քանի միլիոն դրամի մասին է խոսքը, սակայն մտադիր են եկող տարի խնդիրը լուծել: Գնել Սանոսյանն ասաց, որ այդ թաղամասում բնակվող 5 այդպիսի ընտանիք կա:
Այս գյուղի բնակիչները նաեւ դժգոհեցին, որ անասնաֆերմա են կառուցել, սակայն հոսանքի խնդիր ունեն: Վարչապետից հետաքրքրվեցին՝ ճանապարհները ե՞րբ են բացվելու, որ կարողանան գնալ արտագնա աշխատանքի, քանի որ գյուղն այդ աշխատանքով է ապրում:
Լուսինե ԲՈՒԴԱՂՅԱՆ
