Ինչպես տեղեկանում ենք ՀՀ աշխատանքի և սոցիալական հարցերի նախարարության զբաղվածության պետական գործակալության պաշտոնական էջից, Գյումրիում այս պահին 73 թափուր աշխատատեղ կա։
Սակայն, ի տարբերություն նախորդ տարվա, երբ քաղաքը եռում էր, հատկապես ազատ օրերին զբոսաշրջիկների հոսքը չէր դադարում, կենտրոնական հատվածներում ասեղ գցելու տեղ չկար, ու մեկը մյուսի հետևից սրճարաններ ու ռեստորաններ էին բացվում՝ մատուցողի մասնագիտությունը դարձնելով ամենապահանջվածն, այսօր բժշկի ու դերձակի թափուր աշխատատեղեր կան։
73 թափուր աշխատատեղերից ընդամենը մեկ մատուցող է պահանջվում՝ 76 հազար դրամ աշխատավարձով։
Հայտարարությունների մեծ մասով պահանջվում են բուժաշխատողներ՝ բժիշկներ, բուժքույրեր և դերձակներ։
Կարդացեք նաև
Թափուր աշխատեղերի մասին հայտարարության համաձայն՝ Գյումրիում կա բժիշկ -անեսթեզիոլոգի, բժիշկ-լաբորանտի, բժիշկ- նյարդավիրաբույժի, բժիշկ-ռեանիմատոլոգի ու բժիշկ-ստոմատոլոգների, դեղագործների ու բուժքույրերի մեծ կարիք։ Նկատենք, որ բժիշկների աշխատավարձը բարձր չէ, օրինակ՝ ռեանիմատոլոգին ժամը 9:00-16:00 աշխատելու համար առաջարկվում է ամսական 85 հազար դրամը, նույնը՝ անեսթեզիոլոգին, նյարդավիրաբույժին էլ ամսական՝ 78 հազար դրամ։
Բուժքույրերին ավելի բարձր աշխատավարձ է առաջարկվում՝ ամսական մինչև 83 հազար դրամ։
Թափուր աշխատատեղերի մեջ մեծ թիվ է կազմում նաև դերձակների պահանջարկը, նրանց աշխատավարձը կազմում է 70-90 հազար դրամ։ Կա նաև վարսահարդարի ու մատնահարդարի մեծ պահանջարկ։
Նունե ԱՐԵՎՇԱՏՅԱՆ
