Եվրամիության երկրների արտաքին գործերի նախարարներն օգոստոսի 14-ին քննարկելու են Բելառուսում կայացած նախագահական ընտրությունների եւ իշխանության կողմից ճնշվող ցույցերի հարցը: BBC-ի հաղորդմամբ՝ չի բացառվում, որ Բելառուսի հանդեպ Եվրամիության պատժամիջոցները վերականգնվեն:
«Լուկաշենկոյին պետք է մղել գնալ խաղաղ ճանապարհով, զարգացնել հարաբերությունները Արեւմուտքի եւ Եվրամիության հետ: Եթե իրավիճակը վատթարանա, պատժամիջոցներից խուսափել չի լինի»,-դեռեւս շաբաթվա սկզբին, ինչպես հիշեցնում է աղբյուրը, ասել էր Լեհաստանի ԱԳ նախարար Յացեկ Չապուտովիչը:
Չորս տարի առաջ մասնակի հանված պատժամիջոցները վերականգնելու մասին ակնարկել է նաեւ Գերմանիայի արտաքին գերատեսչության ղեկավարը: Ուրբաթ նախատեսվելիք տեսակապով համաժողովի ընթացքում նախատեսվում է քննարկել նաեւ իրավիճակը Լիբանանում:
Հիշեցնենք, որ 2016թ.-ին Եվրամիությունը չեղարկել էր Բելառուսի նախագահ Ալեքսանդր Լուկաշենկոյի եւ բելառուսցի 169 չինովնիկների հանդեպ կիրառած պատժամիջոցները՝ բացառությամբ ուժային կառույցների մի քանի ազդեցիկ ներկայացուցիչների, որոնք, ըստ ԵՄ-ի, կանգնած են 1999-2000թթ. Լուկաշենկոյի քաղաքական հակառակորդների անհետացման գործողությունների հետեւում: Պատժամիջոցները կիրառվել էին Բելառուսում դեռեւս 1998թ.-ին՝ մարդու իրավունքների եւ ժողովրդավարական գործընթացների խախտումների համար: Ավելի ուշ ԱՄՆ-ն եւս պատժամիջոցներ էր կիրառել Բելառուսի հանդեպ:
Կարդացեք նաև
Հավելենք, որ օրերս Բելառուսում կայացած նախագահական ընտրությունների արդյունքներով Ալեքսանդր Լուկաշենկոն վերընտրվել է նախագահի պաշտոնում: Երկրում զանգվածային ցույցեր են:
Լուիզա ՍՈՒՔԻԱՍՅԱՆ
