Covid-19-ի համավարակից պաշտպանվելու եւ այն չտարածելու համար կառավարությունը մշակել է հակահամաճարակային կանոններ: Պարտադիր է ձեռքերը հաճախ ախտահանել, օճառով լվանալ, պարտադիր է նաեւ յուրաքանչյուր քաղաքացու դիմակ կրելը հանրային վայրերում, անգամ բակերում ու ավտոմեքենայի մեջ։ Բացառություն են կազմում մինչեւ վեց տարեկան երեխաները, որոնք կարող են չկրել: Ինչպես հայտնի է՝ հանրային վայրում դիմակ չկրելու դեպքում քաղաքացին տուգանվում է 10.000 ՀՀ դրամով, սակայն ի՞նչ միջոցառումներ է իրականացնում ոստիկանությունը 6 տարեկանից բարձր տարիքային խմբի երեխաների դեպքում, երբ դիմակը բացակայում է: Արդյոք ոստիկանությունը նրանց տուգանո՞ւմ է, երեխա՞ն էլ պետք է ունենա անձը հաստատող փաստաթուղթ:
Այս առնչությամբ, Aravot.am-ի հարցերին ի պատասխան՝ ՀՀ ոստիկանությունից հայտնեցին, որ ըստ Վարչական իրավախախտումների վերաբերյալ ՀՀ օրենսգրքի 12-րդ հոդվածի՝ վարչական պատասխանատվության ենթակա են այն անձինք, որոնց 16 տարին լրացել է մինչեւ վարչական իրավախախտում կատարելու պահը. «Նույն օրենսգրքի 13-րդ հոդվածի 2-րդ մասի համաձայն՝ 16-ից մինչեւ 18 տարեկան անձինք սույն օրենսգրքի 53, 123-131, 160, 172, 173, 182, 190-193 հոդվածներով նախատեսված վարչական իրավախախտումներ կատարելու դեպքում ենթակա են վարչական պատասխանատվության ընդհանուր հիմունքներով: Հաշվի առնելով կատարված իրավախախտման բնույթն ու խախտողի անձը, նշված անձանց վերաբերյալ գործերը (բացառությամբ սույն օրենսգրքի 182 հոդվածով նախատեսված իրավախախտումներ կատարած անձանց) կարող են հանձնվել, իսկ սույն օրենսգրքի 53 հոդվածով նախատեսված իրավախախտումներ կատարելու դեպքում, որպես կանոն, ենթակա են հանձնման, շրջանային (քաղաքային), քաղաքների շրջանային խորհուրդների գործկոմների անչափահասների գործերի հանձնաժողովների քննությանը (ընդհանուր հիմունքներով)»:
Ոստիկանությունից նաեւ նշեցին, որ վեց տարեկանից մինչեւ 16 տարեկան երեխան տանից դուրս գալիս անձը հաստատող փաստաթուղթ ունենալու պարտականություն չունի եւ որեւէ իրավական ակտով նման դրույթ նախատեսված չէ. «Իսկ վեցից տասնվեց տարեկան անձանց կողմից դիմակ չկրելու պարագայում ծնողը չի ենթարկվում վարչական պատասխանատվության»։
Նատալի ՄԿՐՏՉՅԱՆ
Կարդացեք նաև
«Առավոտ» օրաթերթ
12.08.2020
