Նորո Դովլաթյանը պարտադիր զինվորական ծառայությունն ավարտելուց հետո ստեղծել է բարբառախոս շապիկների հավաքածու, որն այսօր պահանջարկ ունի հետաքրքրասերների շրջանում։
«Քանի որ ծառայել եմ Արցախում, շատ եմ սիրել Արցախի բարբառը։ Ինքս լինելով Սյունիքի մարզի Քաջարան քաղաքից՝ նկատեցի, որ մեր բարբառները շատ նման են եւ որոշեցի այդպիսի մի հավաքածու ստեղծել»,-ասում է դիզայներ Նորո Դովլաթյանը։
Հավաքածուն ունի մի շարք առանձնահատկություններ։ Կարեւորներից մեկն այն է, որ շապիկներն ուսուցողական են. դիզայները նպատակ ունի աշխարհով մեկ տարածել մեր բարբառն ու այն պահել սրբությամբ, որպեսզի չմոռացվի։
Սիրով է կատարում յուրաքանչյուր պատվեր, ձգտում է ամեն անգամ կատարելագործել հավաքածուն՝ ավելացնելով տարբեր հետաքրքրություններ։ Արցախում արդեն ներկայացուցիչ ունի՝ Սաթի ձեռագործ աշխատանքների խանութն է։
Զրույցի վերջում նա հավելեց, որ պատվիրատուները կարող են իրենց ցանկացած բարբառային արտահայտություններով եւ բառերով պատվիրել տվյալ շապիկները։
Վովա ԱՐԶՈՒՄԱՆՅԱՆ
Արցախ
«Առավոտ» օրաթերթ
12.08.2020
