«Ես որեւիցե խնդիր չունեմ դեպքի հետ կապված, պարզ ճակատով եմ եւ նույնիսկ այն տեսանյութը, որը հրապարակում են, փորձում են ինձ վարկաբեկել… ուստի, ինձ համար այդ թեման շատ շուտվանից փակված է: Դատարանի վճիռ կլինի, կգնաք ձեր նշած «հերոսներից» կհարցնեք մնացած բոլոր ձեզ հետաքրքրող հարցերը»,- խորհրդարանում լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ պատասխանելով Արթուր Դանիելյանի եւ իր միջեւ տեղի ունեցող ծեծկռտուքին, այդ առիթով հարուցված քրեական գործին վերաբերող հարցին։
ՀՔԾ-ն հաղորդագրություն էր տարածել, որ Արթուր Դանիելյանին հարված հասցնելու պահին Ալեն Սիմոնյանը գտնվել է հոգեկան խիստ հուզմունքի վիճակում: Լրագրողի հարցին՝ կա՞ փորձագետի եզրակացություն, որ ինքը գտնվել է աֆեկտի տակ, կամ ինչի՞ վրա է հիմնվել ՀՔԾ–ն, երբ որոշել է, որ Ալեն Սիմոնյանն անակնկալի է եկել, դրա համար է հարվածել Արթուր Դանիելյանին, ԱԺ փոխնախագահը ուղիղ չպատասխանեց, այլ մեղադրանքներ հնչեցրեց լրագրողի հասցեին՝ հարց տալու եւ, իբր, գործից անտեղյակ լինելու մեջ: Ալեն Սիմոնյանը նաեւ ասաց, որ ինքը գործով ունի տուժողի կարգավիճակ։
Հիշեցնենք՝ Արթուր Դանիելյանն այս գործով ունի մեղադրյալի կարգավիճակ։ Նրան մեղադրանք է առաջադրվել ՀՀ ՔՕ 258-րդ հոդվածի 2-րդ մասով՝ խուլիգանություն, որն ուղեկցվել է անձի նկատմամբ բռնություն գործադրելով: Տարակուսանք է առաջացրել այն փաստը, որ չնայած Ալեն Սիմոնյանն ասել էր, թե ինքն է առաջինը հարվածել Դանիելյանին, կա նաեւ տեսագրությունը, ՀՔԾ–ն միայն Արթուր Դանիելյանին է ներգրավել որպես մեղադրյալ։ Արթուր Դանիելյանի փաստաբան Տիգրան Աթանեսյանը հայտնել էր, որ քրեական գործի նախաքննության ընթացքում նշանակված դատահոգեբանական փորձաքննության եզրակացությամբ՝ ԱԺ փոխխոսնակ Ալեն Սիմոնյանի մոտ աֆեկտ չի հաստատվել:
Նելլի ԳՐԻԳՈՐՅԱՆ
