«Հնարավո՞ր է Վրաստանի քաղաքացիների համար բացառություն անել եւ ՀՀ-ի ցամաքային սահմանը բացել: Օդային փոխադրումները շարժի չնչին տոկոսն են կազմում, Վրաստանի հետ ցամաքային կապն է ավելի նախընտրելի»,-ԱԺ հատուկ նիստում այսօր ՀՀ պարետ, փոխվարչապետ Տիգրան Ավինյանին ասաց «Իմ քայլի» պատգամավոր Շիրակ Թորոսյանը: Նրա խոսքով՝ սեպտեմբերին հարյուրավոր, եթե ոչ՝ ավելի, ուսանողներ են ուզում գալ ՀՀ սովորելու, բայց օդանավով ժամանելը հարմար չէ:
Տիգրան Ավինյանը պատասխանեց. «Սա երկկողմ հարաբերություններից եւ համաճարակային իրավիճակից կախված հարց է: Այն մեր օրակարգում է, բայց քանի դեռ չունենք էական բարելավում, որն այսօր աշխարհում չկա, դեռեւս մեղմացումների դիմել չենք կարող»:
Թորոսյանը հավելեց, որ Վրաստանի հետ նշյալ հարցով քննարկումը հրատապ է, որովհետեւ ուսանողները չեն կարող ինքնաթիռով գալ ՀՀ:
Ավինյանը վստահեցրեց, որ ԿԳՄՍՆ-ի հետ հարցը կքննարկեն:
Կարդացեք նաև
Հիշեցնենք, որ կառավարությունն այսօր որոշել է կորոնավիրուսի տարածմամբ պայմանավորված արտակարգ դրության ժամկետը երկարաձգել մինչեւ սեպտեմբերի 11-ը, եւ օրենքի ուժով ԱԺ-ում ներկայացվում է որոշումը:
Լուիզա ՍՈՒՔԻԱՍՅԱՆ
