Այսօրվանից մինչեւ սեպտեմբերի 11-ը երկարաձգվում է ՀՀ-ում արտակարգ դրության ժամկետը: Այս մասին որոշվեց կառավարության այսօրվա արտահերթ նիստում: Սա 5-րդ երկարաձգումն է:
Ըստ որոշման նախագծի, թեեւ արտակարգ դրությունը երկարացվում է, սակայն որոշակի մեղմացումներ են սահմանվում: Վերացվում է ՀՀ քաղաքացիություն չունեցող անձանց ՀՀ մուտքի արգելքը, սակայն ՀՀ մուտք գործելիս, անձի նկատմամբ չի կիրառվում հոսպիտալացում, բայց սահմանվում է 14 օրյա ինքնամեկուսացման ռեժիմ: Բայց եթե այդ օրերի ընթացքում անձը թեստավորվի եւ թեստի պատասխանը բացասական լինի՝ ինքնամեկուսացման ռեժիմը փոխվում է;
Ինչպես նաեւ վերացվում է ՀՀ ամբողջ տարածքում հավաքների եւ գործադուլների արգելքը, հավաքները թույլատրվում են պարետի սահմանած կանոնների պահպանմամբ՝ սոցիալական հեռավորության պահպանումը, դիմակի պարտադիր կրումը:
Մեղմացվում են նաեւ ընտանեկան արարողությունների եւ ժամանցային բնույթի միջոցառումների կազմակերպման պահանջները, հիմա այս միջոցառումները կարող են կազմակերպվել փակ եւ բաց տարածքներում, բայց ոչ ավելի, քան 40 անձով, կրկին՝ պահպանելով կանոնները:
Կարդացեք նաև
Նախագիծը զեկուցող արդարադատության նախարար Ռուստամ Բադասյանն ասաց, որ վերացվում է նաեւ մաքսային սահմանով ապրանքների փոխադրման սահմանափակումների կիրառությունը:
Վարչապետ Նիկոլ Փաշինյանն ասաց՝ եթե այս սահմանափակումների մեղմացման հետեւանքով համաճարակային վիճակը վատանա, կառավարությունը ստիպված կլինի կրկին խստացումներ սահմանել:
Նելլի ԲԱԲԱՅԱՆ
