Ռուսաստանն աշխարհում առաջինը գրանցեց կորոնավիրուսի դեմ պատվաստանյութը: Այսօր այս մասին կառավարության անդամների հետ խորհրդակցության ժամանակ հայտարարել է ՌԴ նախագահ Վլադիմիր Պուտինը. «Որքան ինձ հայտնի է, այսօր առավոտյան աշխարհում առաջին անգամ գրանցվել է նոր կորոնավիրուսի դեմ պատվաստանյութը: Այն բավականին արդյունավետ է, կայուն իմունիտետ է ձեւավորում եւ անցել է բոլոր անհրաժեշտ փորձարկումները»:
Պուտինը նաեւ ասել է, որ իր դուստրերից մեկը նույնպես արդեն պատվաստվել է, ու թեեւ պատվաստվելուց հետո նրա ջերմությունը մի փոքր բարձրացել է՝ նա հիմա իրեն լավ է զգում: ՌԴ նախագահը նաեւ հույս է հայտնել, որ պատվաստանյութի տարածումը կսկսվի առաջիկայում եւ իրենք կկարողանան ապահովել պատվաստանյութի անվտանգությունն ու արդյունավետությունը:
ՌԴ առողջապահության նախարար Միխայիլ Մուրաշկոն էլ հայտնել է, որ կլինիկական փորձարկումներն արդեն ավարտվել են եւ պատվաստանյութը բավականին բարձր արդյունավետություն է ցույց տվել եւ որ ամենակարեւորն է՝ այն անվտանգ է: Ըստ նրա՝ բոլոր կամավորների մոտ պատվաստանյութից հետո գրանցվել են վիրուսի դեմ բարձր հակամարմիններ եւ պատվաստվողներից որեւէ մեկի մոտ չեն արձանագրվել բարդություններ:
Առողջապահության ազգային ինստիտուտի համաճարակաբանության և բժշկական ինֆորմատիկայի ամբիոնի վարիչ Վլադիմիր Դավիդյանցը մեզ հետ զրույցում ասաց՝ դեռ չի շտապի գնահատական տալ կամ կարծիք հայտնել գրանցված պատվաստանյութի մասին, որովհետեւ հետեւում է ընթացքին ու սպասում է գիտական եզրակացությանը:
Կարդացեք նաև
«Այո, այսօր շատ պետություններ են աշխատում պատվաստանյութի ստեղծման ուղղությամբ, շատ հարուստ պետություններ, բայց ինչով է Ռուսաստանը զիջում նրանց, ինչու ոչ Ռուսաստանը, եկեք մի փոքր սպասենք, այն առայժմ փորձարկվում է, սպասենք գիտական եզրակացությունների, ավելի ուշ կարծիք կհայտնեմ»:
Արփինե ՍԻՄՈՆՅԱՆ
