«Ինձ համար շատ ցավալի է սա նշել, բայց մենք հասել ենք նրան, որ Երևանում ընդհանուր օգտագործման կանաչ տարածքները կազմում են ընդհանուր տարածքի 4,2%, երբ այդ ցուցանիշը պետք է լինի 20%, հակառակ դեպքում՝ ազգաբնակչության համար մի շարք խնդիրներ են առաջանում: Եվ սա դեռ ամենավատը չէ: Մեր կանաչ ֆոնդը գտնվում է շատ վատ վիճակում, և սա նոր առաջացած խնդիր չէ, այն ձևավորվել է տասնյակ տարիների ընթացքում»,- «Մեդիա կենտրոն»-ի «Երևան. անօդ տարածք, որտեղ ծառերը խանգարում են բետոնին» թեմայով հանրային քննարկման ընթացքում ասաց «Կանաչապատում և շրջակա միջավայրի պահպանություն» ՀՈԱԿ-ի փոխտնօրեն, դոցենտ Քրիստինա Վարդանյանը:
Անդրադառնալով Մաշտոցի պուրակի հարցին, ԳԱԱ Ա.Լ. Թախտաջյանի անվան բուսաբանության ինստիտուտի ավագ գիտաշխատող, կենսաբանական գիտությունների թեկնածու Մերինե Սարգսյանը նշեց՝ լավ է, որ այս անգամ խնդրի շուրջ մեծ աղմուկ չբարձրացավ և պետք է թույլ տալ, որ աշխատանքները ավարտվեն:
«Բնությունը քաղաքականությունից հեռու է: Մենք պետք մի թիմ դառնանք և պահպանենք մեր բնությունը՝ հաշվի չառնելով՝ ով, որ կուսակցության ներկայացուցիչն է, որ դաշինքից է և այլն: Դրա համար պետք է հնարավորություն տանք, որ մարդիկ աշխատեն, զինվենք համբերությամբ և տեսնենք արդյունքները: Որպես մասնագետ կասեմ, որ քաղաքապետարանը հենց այնպես որոշումներ չի կայացնում, խորհրդակցություններ են լինում, մասնագետները ուսումնասիրություններ են կատարում և այլն: Կարծում եմ՝ պետք չէ ներքին խոհանոցին խառնվել: Մեր քաղաքն է, բոլորս էլ սիրում ենք այն»,-ասաց Մերինե Սարգսյանը:
Ջուլետտա Հովսեփյան
