Հայաստանի ֆիզիկական կուլտուրայի եւ սպորտի պետական ինստիտուտի բակում հակահամավարակային բոլոր կանոնները պահպանելով կայացավ կլոր սեղան-խորհրդակցություն «Սպորտի կառավարման եւ մարքեթինգի հիմնախնդիրները, զարգացման հեռանկարները» թեմայով: Քննարկմանը մասնակցեցին ոլորտում տարիների փորձ ունեցող մասնագետները:
ՖԿՍՊԻ ռեկտորի ժամանակավոր պաշտոնակատար Դավիթ Խիթարյանը լրատվամիջոցներին ասաց. «Այսօրվա միջոցառումը նվիրված է Հայաստանի Հանրապետությունում սպորտի կառավարման եւ մարքեթինգի առկա վիճակին եւ զարգացման հեռանկարներին: Կարծում եմ՝ սա բավականին արդիական թեմա է, որովհետեւ Հայաստանում այդ շուկան դեռ զարգացած չէ: Մենք մեր ամբիոնով փորձում ենք շունչ հաղորդել, եւ այսօր այդ նոր շնչի առաջին քայլն է կատարվում:
Իսկ ինչի՞ համար ոլորտը զարգացած չէ: Որովհետեւ սպորտային տնտեսությունը հիմնականում պետական մոնոպոլիա է եւ մասնավորը, եթե կա, վերաբերում է մասսայական սպորտին եւ ոչ պրոֆեսիոնալին: Ժամանակն է, որպեսզի Հայաստանում սպորտը ոչ թե գոյատեւի, այլ զարգանա: Իսկ զարգացման համար կարեւոր նշանակություն ունի սպորտի կառավարումը եւ մարքեթինգը:
Կարդացեք նաև
Այսօր մտքերի փոխանակում է լինելու, ինչը մեզ հնարավորություն կտա ավելի լավ ծրագրեր կազմել, ավելի լավ գործատուների հետ հարաբերություններ ձեւավորել, ինչի արդյունքում կշահի միայն կրթության որակը»:
Աշոտ ՀԱԿՈԲՅԱՆ
