Ազատամարտիկ, քաղաքական մեկնաբան, «Մերոնք» շարքի հեղինակ-վարող Սուրեն Սարգսյանն օգոստոսի 6-ին «Արարատ» մամուլի ակումբում անդրադարձավ հուլիսի 12-ին սկիզբ առած սահմանային լարվածությանը եւ ներքաղաքական զարգացումներին։
Հիշեցնենք, որ իրավիճակը Հայաստանի և Ադրբեջանի սահմանի Տավուշի հատվածում կտրուկ սրվել էր հուլիսի 12-ին, երբ ադրբեջանական զինուժի զինծառայողները ՈւԱԶ-ով պետական սահմանը խախտելու փորձ էին կատարել: Նույն օրը Ադրբեջանի զինված ուժերի զինծառայողները կրկնել էին սահմանային դիրքը գրավելու փորձը` կիրառելով հրետանային կրակ, սակայն ճնշվել էին հայկական կողմից և, կորուստներ տալով, հետ շպրտվել:
Սուրեն Սարգսյանի պնդմամբ, Տավուշյան հաղթանակին նպաստել են զինված ուժերի արդիականությունը եւ զինվորի բարոյահոգեբանական վիճակը․ «Տարիներ շարունակ զինվորից գողացված էր հացը, զրահաբաճկոնը, փամփուշտը եւ սեփական «ես»-ը։ Նման պայմաններում՝ ընկճված մարդը՝ զինվորը չէր կարող հաղթանակել։ Տավուշյան հաղթանակում ամեն ինչ փոխկապակցված է ՝ արդար ընտրություններ, ճշմարիտ կեցվածքով գործիչներ, ծով սեր հայրենիքի նկատմամբ եւ ծայրահեղ զգուշություն ու զգոնություն։ Հայ զինվորն այսօր արժանապատիվ կերպով պահել է սահմանը եւ մի բան էլ ավելին։ Նշանակում է, որ ներկայիս իշխանությունը կարողացել է տալ կազմակերպված պետության սկիզբը։ Պետք է չթուլանալ ՝թշնամին քնել չի սիրում»։
Դժգոհություններ էլ կան՝ նկատեց բանախոսը, բայց հույս հայտնեց, որ ամեն ինչ ուղղվելու է․ «Բարեփոխումները կարեւոր են, բայց դրանք չպետք է համեմվեն աղբով։ Գրականություն են գրում՝ հայհոյանք է, նման անորակ գրականություն գրողին ո՞վ է բերում դպրոց։ Այստեղ է, որ ասում են՝ Փաշինյանը սխալ է։ Նման ծայրահեղ քայլերում իշխանությանն անհրաժեշտ է շատ զգույշ լինել․ ատելության մթնոլորտ է ստեղծվում , որը կհասունացնի նոր «հոկտեմբերի 27»։
Կարդացեք նաև
Սուրեն Սարգսյանը հավելեց՝ իշխանության գործունեության գնահատականը վերջապես կտրվի այն ժամանակ, երբ յուրաքանչյուրս օգտագործենք մեր ընտրելու հնարավորությունը։
Էլիզաբեթ ԹՈՎՄԱՍՅԱՆ
