«Կարելի է արտակարգ դրությունը հանել, բայց նույն այդ ռեժիմը պահել՝ դիմակ կրել, սոցիալական հեռավորությունը պահել: Հո սաղ երկրներում արտակարգ դրություն չի՞, բայց ավելի վատ վիճակում են այնտեղի թվերը, քան մերը: Բոլորս հույսով սպասում ենք, որ արտակարգ ռեժիմ կմշակվի, որը չի խանգարի սահմանների բացմանը»,-այսօր կառավարության առաջ այսպիսի դժգոհություն հայտնեցին քաղաքացիները՝ բողոքելով արտակարգ ռեժիմի երկարաձգման դեմ: Նրանք արտակարգ դրություն հայտարարելուց առաջ՝ մարտ ամսին, եկել են Ռուսաստանի Դաշնությունից եւ սահմանների փակ լինելու պատճառով չեն կարողանում վերադառնալ:
Նրանց խոսքով, վարչապետը խոստացել էր, որ արտակարգ դրությունը չի երկարաձգվի, սակայն, երեկ պարետ Տիգրան Ավինյանը հայտարարեց, որ մեկ ամսով կրկին երկարաձգվում է: Բողոքի ցույցի մասնակիցների ներկայացմամբ, արդեն քանի ամիս է «գերի են Հայաստանում» եւ ընտանիքներից բաժանված՝ ապրում են. «Շատերն էլ ընտանիքը պահելու խնդիր ունեն, թույլ չեն տալիս, որ մարդիկ գնան՝ աշխատեն, իրենց տունը պահեն»:
«Անհասկանալի է՝ ինչ տրամաբանությամբ է երկարաձգվում, ամեն ինչ բաց է, աշխատում է, ռեստորանները աշխատում են, միայն դիմակ կրե՞լն է արտակարգ դրությունը: Խնդրում ենք, որ մեր ձայնը Փաշինյանը լսի եւ սահմանները բացի: Մենք ազատ երկրում ենք ապրում եւ մենք ենք որոշում՝ որտեղ պետք է ապրենք, մենք չենք ուզում մեր երկրում բռնատիրություն լինի եւ մեր երկրում գերի լինենք»,-ասաց ցույցի մասնակից Քրիստինե Սարգսյանը:
Քաղաքացիներից մեկն էլ, դիմելով վարչապետին, նշեց, որ կարեւոր է՝ բանակցել եւ դեպի Ռուսաստան ճանապարհը բացել Վրաստանով՝ տարանցիկ, որպեսզի մարդիկ հնարավորություն ունենան գնան՝ գան: Նրա խոսքով, իրենք պատրաստակամ են պահել հակահամաճարակային կանոնները եւ ծախսերը հոգալ՝ կլինի թեստավորում եւ այլն:
Կարդացեք նաև
Լուսինե ԲՈՒԴԱՂՅԱՆ
