Այսօր՝ օգոստոսի 5-ին, պարետատունը հրապարակեց իր որոշումը, ըստ որի՝ մարտի 16-ին հայտարարված և մինչև օգոստոսի 12-ը տևած արտակարգ դրությունը կերկարաձգվի ևս 30 օրով:
Այս ընթացքում տուժել են տնտեսության մի շարք ոլորտներ, իսկ տնտեսվարողների մեծ մասը հուսով էր, որ արտակարգ դրությունը այլևս չի երկարաձգվի:
«Հայաստան վերադարձել եմ մինչև համավարակի սկսվելը, որոշել էի այստեղ իմ բիզնեսը սկսել և նորաձևության տուն հիմնել, բայց պլաններս լիովին ձախողվեցին: Տարածքի համար բարեբախտաբար դեռ չէի վճարել, բայց վաճառքի տեսականին արդեն պատրաստել էի: Փորձեցի օնլայն վաճառել, բայց դա էլ չստացվեց: Աջակցման ծրագրերին դիմեցի, բայց ինձ ասացին «չեք տուժել, էլ ի՞նչ աջակցություն»: Գուցե ուրիշ ոլորտներ ավելի մեծ կորուստներ են ունեցել, բայց իմ դրամական կորուստներն էլ չնչին չէին: Հուսով էի՝ արտակարգ դրությունը կհանվի, մեկ է, դա ոչ ոքի ոչինչ չի ասում այլևս, բայց ևս մեկ ամիս պետք է շարունակենք «դիմակահանդես»-ը »,- մեզ հետ զրույցի ժամանակ ասաց հագուստի մոդելավորող Լիանա Հովսեփյանը:
Ի տարբերություն մի շարք ոլորտների, շինանյութի ոլորտը այդքան էլ չի տուժել: Ինչպես նշում են տնտեսվարողները, դիմակներից հոգնել են, բայց գործ կարանտինի ժամանակ էլ ունեին:
Կարդացեք նաև
«Չեմ կարող կոնկրետ թվեր ասել, բայց գործը այս ընթացքում ավելի է շատացել: Մարդիկ վերանորոգում էին անում, ռեստորանները, սրճարանները ընդլայնվում էին, և մեր ոլորտը միայն շահեց, բայց, ցավոք, արտակարգ դրությունը երկարաձգեցին: Տնտեսությունը շատ է տուժել, պարզ չի ինչքան ժամանակում ուշքի կգա, իսկ մարդիկ տուգանվելուց էլ չեն վախենում, ուզում են հանգիստ ապրել»,-նշեց շինանյութերի ցանցի տնօրեն Արման Բաղումյանը:
Ջուլետտա ՀՈՎՍԵՓՅԱՆ
