2016թ.-ին ՀՀ ոստիկանության ՊՊԾ գունդը զավթած եւ մի շարք ծանր հանցագործությունների կատարման համար մեղադրվող «Սասնա ծռեր» խմբի (Պավլիկ Մանուկյան, Վարուժան Ավետիսյան եւ մյուսներ) գործով հերթական դատական նիստն այսօր ընդմիջվեց՝ մեղադրյալների պաշտպաններից Տիգրան Եգորյանի ուշացման պատճառով: Նա դատարանին զանգով տեղեկացրել էր, որ կրկեսի մոտ է եւ շուտով կհասնի:
Նշենք, որ նախորդ նիստում պաշտպանը եւս ուշացել էր: Այսօր էլ դատավոր Մեսրոպ Մակյանը նիստը վերսկսելիս արձանագրեց, որ 20 րոպե ուշացմամբ Եգորյանը ներկայացավ: Վերջինս հայցեց դատարանի ներողամտությունը եւ պատճառը ներկայացրեց, որը, սակայն, լսելի չէր, դատավոր Մակյանն էլ արձագանքեց. «Ուշացող մարդու համար պատճառներ միշտ էլ կան…Պարզ ասեմ՝ արդեն մի տեսակ ամաչում էլ եմ այդ թեմային անդրադառնալ: Արդեն դաստիարակությունս թույլ չի տալիս անդրադառնալ»:
Տիգրան Եգորյանը տեղից արձագանքեց, սակայն կրկին լսելի չէր: Ի պատասխան Մեսրոպ Մակյանն ասաց. «Պարոն Եգորյան, կարծում եմ՝ լռելն ավելի ճիշտ կլինի»:
Ապա դատավորը դժգոհեց, որ նախորդ նիստում արված միջնորդության վերաբերյալ հարցադրումները պաշտպանը պետք է ուղարկեր նախորդ նիստից ժամեր անց, ինչպես ասվել էր, սակայն ուղարկել է մեկ շաբաթ անց, այն էլ՝ դատական նիստից առաջ, երբ ինքն արդեն եկել էր դահլիճ՝ նիստը բացելու:
Կարդացեք նաև
Հավելենք, որ այսօրվա նիստում ներկայացվելու է ՊՊԾ գնդում մահացած ոստիկաններից Յուրի Տեփանոսյանի մահվան հանգամանքների առնչությամբ համալիր փորձաքննություն կատարելու միջնորդություն:
Լուիզա ՍՈՒՔԻԱՍՅԱՆ
