Ինչու էր ազդագրերում բացակայում նրա բեմական զգեստները ստեղծած Պիեռ Կարդենի անունը
Բալետի ականավոր պարուհի եւ խորեոգրաֆ Մայա Պլիսեցկայան ոչ միայն բալետային լեգենդ էր, այլեւ նրբաճաշակության էտալոն:
Նրա ծնողները բռնատիրության զոհեր էին, ու ծնողների ճակատագրի պատճառով մի շրջան պարուհին չէր կարող դուրս գալ ԽՍՀՄ-ից, բայց դա չէր խանգարում գեղեցիկ զգեստներ ձեռք բերել ու արժանապատիվ ներկայանալ այն ժամանակվա բարձրաշխարհիկ երեկույթներին:
kulturologia.ru-ի փոխանցմամբ, Մայա Պլիսեցկայան անձամբ ծանոթ էր Կոկո Շանելի եւ Պիեռ Կարդենի հետ, հատկապես վերջինիս մուսան էր համարվում:
Կարդացեք նաև
Նա կարեւորություն էր տալիս մշտապես խնամված լինելուն եւ գեղեցիկ հագնվելուն, զգեստների մեծ մասը ձեռք էր բերում վերավաճառող առեւտրականներից:
Պլիսեցկայան համաձայնում էր հանդես գալ անգամ գավառական ակումբներում, միայն թե գումար աշխատեր՝ թանկարժեք կոշիկներ, հագուստներ ու խնամքի պարագաներ գնելու համար:
Երբ վաթսունականներին Մայա Պլիսեցկայան շատ կարճ զգեստով հայտնվում է Մեծ թատրոնի բեմում՝ Կարմենի կերպարով, այդ ժամանակվա մշակույթի նախարար Եկատերինա Ֆուրցեւան հանդիմանում է արտիստուհուն եւ պահանջում երկար փեշ հանգնել: «Մայա, այդ բաները մեզ օտար են, դա չէ մեր ճանապարհը»,-ասել էր նախարարը:
Իսկ երբ մի անգամ կաշվե կտորներով ու կարակուլե մուշտակով հայտնվում է հասարակության մեջ, Պլիսեցկայայի հետեւից փսփսում են, թե նա մեղք է «ծորում»:
Յոթանասունականների սկզբներին Մայա Պլիսեցկայային վերջապես թույլատրեցին արտասահմանյան ուղեւորություններ ունենալ, եւ նա կարողացավ երես առ երես հանդիպել Պիեռ Կարդենի հետ: Աշխարհահռչակ դիզայների հետ մտերմությունը շարունակվեց մի քանի տասնյակ տարի: «Ճայի», «Աննա Կարենինայի», «Շնիկով տիկնոջ» եւ այլ գլուխգործոցներում Պլիսեցկայայի զգեստները հենց Պիեռ Կարդենն է ստեղծել: Ասում են՝ դիզայները ցանկացել է, որ բալետի պարուհին այդ զգեստները կրի իր «մաշկի» նման, եւ դրանք իրեն չխանգարեն բեմում ելույթ ունենալիս:
Խորհրդային տարիներին մշակույթի նախարարությունն ամեն ինչ արել է, որպեսզի արտասահմանցի դիզայների անունը չերեւա ներկայացումների ազդագրերում: Չնայած դրան՝ Պիեռ Կարդենն անվճար էր ստեղծում Պլիսեցկայայի բեմական եւ առօրյա զգեստները: Երկաթյա վարագույրի անկումից հետո 1983թ. բալետի թագուհին ձեւը գտավ երախտագիտություն հայտնելու դիզայներին եւ Կրեմլում կազմակերպեց «Նորաձեւությունն ու պարը» խորագրով բացառիկ շոու:
Նրա տաղանդով եւ գեղեցկությամբ հիացած էր մեկ այլ հանրահայտ դիզայներ՝ Իվ Սեն Լորանը, որն էլ ստեղծեց ֆրանսիացի խորեոգրաֆ Ռոլան Փետիի բեմադրած բալետի համար՝ Պլիսեցկայայի զգեստները: Պարուհին համագործակցել է նաեւ Ռոյ Հալսթոնի եւ Ժան-Պոլ Գոթյեի հետ: Նրա լուսանկարները հայտնվել են տարբեր ամսագրերի, այդ թվում՝ Vogue-ի շապիկին: Արտասահմանյան մի ուղեւորության ժամանակ էլ ծանոթացել է Կոկո Շանելի հետ, որն արդեն ութսուն տարեկան էր: Հատուկ Պլիսեցկայայի համար Շանելը ցուցադրություն էր կազմակերպել եւ առաջարկել ընտրել ցուցադրված թանկարժեք հավաքածուից զանկացած նմուշ: Պարուհին ընտրել էր ոսկե կոճակներով զարդարված մետաքսե մի սարաֆան, որը հագնում էր առանձնահատուկ առիթների ժամանակ:
Ասում են՝ Պլիսեցկայան առաջին կինն էր ԽՍՀՄ-ում, որ սպիտակ սամույրից մանթո էր կրում, նաեւ հագնում էր նեղ անդրավարտիք: Ամեն դեպքում, պարուհու ամեն զգեստը տեսնելուց հետո շատերը սկսում էին նրա նման հագնվել: Պլիսեցկայան ճաշակ էր թելադրում:
Հավելենք, որ Մայա Պլիսեցկայան հյուրախաղերով շրջել է ԱՄՆ-ում, Մեծ Բրիտանիայում, Ֆրանսիայում, Իտալիայում, Կանադայում եւ այլուր, իսկ 1957-ին մի քանի դերապարով հանդես է եկել Երեւանում:
Պատրաստեց Գոհար ՀԱԿՈԲՅԱՆԸ
«Առավոտ» օրաթերթ
04.08.2020
