Լրահոս
Օրվա լրահոսը

«Մատների վրա հաշվելու այդ մարդկանցից մեկը Յուրի Խաչատուրովն է, որով կարելի է հպարտանալ». Վարդեւանյանը՝ դատավորին

Օգոստոս 04,2020 17:57

Երկրորդ նախագահ Ռոբերտ Քոչարյանի եւ մյուսների գործով հերթական դատական նիստն է Երեւանի ընդհանուր իրավասության դատարանում:

Ինչպես տեղեկացրել ենք, Յուրի Խաչատուրովի պաշտպան Միհրան Պողոսյանը միջնորդություն էր ներկայացրել Խաչատուրովի խախտված իրավունքը վերականգնելու ու գործի նյութերը, մեղադրանքը Խաչատուրովին թարգմանված գրավոր ներկայացնելու համար: Դրան հաջորդել էր Խաչատուրովի ելույթը:

Քոչարյանի պաշտպան Արամ Վարդեւանյանը հայտարարեց. «Թե՛ իրավական, թե՛ առհասարակ պետական տեսանկյունից, Հայաստանի Հանրապետությունը մատների վրա կարող է հաշվել, թե քանի գեներալ գնդապետ ունի զինված ուժերում: Այդ մատների վրա հաշվելու գեներալ գնդապետներից, որոնցով նաեւ վստահ եմ, նույնիսկ դուք էլ, դատական պրոցեսից զատ, եթե ունենում եք պետական հպարտության զգացում, այդ մարդկանցից մեկը Յուրի Խաչատուրովն է, որով կարելի է հպարտանալ: Մարդ, ով իր ամբողջ կյանքը նվիրել է զինվորական ծառայությանը, բանակաշինությանը եւ կարելի է ասել այդ նույն ազգանվան ցեղը շարունակվում է: Պահանջը, խնդրանքը մեկն էր՝ գործի նյութերը տրամադրվի, որով, հարգելի դատարան, դուք նախադեպ չէիք ստեղծելու: Ի՞նչ խնդիր էր լինելու, կարող է պետությունը այդ բեռը թարգմանության չէ՞ր կարող վերցնել: Մենք, որպես ՀՀ քաղաքացիներ շատ ավելի մեծ պարտքի զգացում պետք է ունենանք Խաչատուրովի նման մարդկանց նկատմամբ»:

Տուժողի ներկայացուցիչ Սեդա Սաֆարյանն առարկեց, նա ասաց, որ արդեն միջնորդության վերաբերյալ որոշումը կայացվել է, ուստի հիմա նորից ի՞նչ քննարկում են ծավալում. «Այսպես չի կարելի»:

Քոչարյանի պաշտպան Հովհաննես Խուդոյանն ասաց, որ եթե դատարանը թույլատրում է Խաչատուրովին բանավոր ծանոթանալ գործի նյութերին՝ թարգմանված, գրավոր դա կազմակերպելով՝ մեր պետությունը չի սնանկանալու: Բացի այդ, նա նշեց, որ դատական ծախսերը դրվելու են մեղավորների վրա. «Դուք ցանկանում եք, որ Խաչատուրովն իր գործի նյութերին ծանոթանա առավելագույնս դիսկոմֆորտ պայմաններում»:

Դատավորը լսեց ու հիշեցրեց, որ միջնորդության վերաբերյալ ինքն արդեն որոշումը հրապարակել է:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Օգոստոս 2020
Երկ Երե Չոր Հնգ Ուրբ Շաբ Կիր
« Հուլ   Սեպ »
 12
3456789
10111213141516
17181920212223
24252627282930
31