Այսօր պրոֆեսոր Ռ. Յոլյանի անվան արյունաբանական կենտրոնում ԲԿՄԱ ֆուտբոլային ակումբը եւ «Ժպիտների քաղաք» բարեգործական հիմնադրամը մտադրությունների մասին հուշագիր ստորագրեցին, որի շրջանակներում ֆուտբոլային թիմը մեկ տարի անհատույց կրելու է հիմնադրամի տարբերանշանով մարզաշապիկներ:
Նպատակը՝ հանրությանը հիմնադրամի գոյության եւ գործունեության մասին իրազեկելն է ճանաչելիության բարձրացումը, հանրության շրջանում բարեգործության մշակույթի զարգացմանը նպաստելը:
ԲԿՄԱ ակումբի տնօրեն Գագիկ Աղբալյանը Aravot.am-ին ասաց, որ իրենք հիմնադրամի հետ համագործակցում են փոխադարձ հարգանքով եւ վստահությամբ, մասնակցել են տարբեր ակցիաների: «Համագործակցության այս տարբերակի առաջարկությունը մենք ենք արել: Սա, պարզապես, ավելի վաղ ստեղծված համագործակցության տրամաբանական շարունակությունն է: Այսպես, մենք ցանկանում ենք շնորհակալություն հայտնել հիմնադրամին եւ մեր բարոյական աջակցությունը բերել այն առումով, որ «Ժպիտների քաղաք» հիմնադրամը արդեն տասնյակ երեխաների առողջացման խնդիր են կարողացել լուծել, տասնյակ երեխաներ էլ կենտրոնում այսօր բուժում են ստանում: Պարզապես, որպես սպորտային թիմ, իսկ ֆուտբոլը նաեւ սոցիալական երեւույթ է, մենք չենք կարող անտարբեր լինել սոցիալական այս կարեւոր խնդիրներին: Այդ իսկ պատճառով ԲԿՄԱ-ն շատ կարեւոր տեղ է հատկացնում այս ընդգրկվածությանը»,-ասաց Գագիկ Աղբալյանը:
Աշոտ ՀԱԿՈԲՅԱՆ
