Խակ խաղողով թանձրուկը վրացական խոհանոցի հետաքրքիր կերակրատեսակներից է, համով նման է տխեմալիին՝ թթվաշ ու շատ հաճելի: Դե իսկ հավը՝ քաղցրաթթվաշ թանձրուկներով, արտակարգ համադրություն է ստացվում:
Անհրաժեշտ մթերքները
Խակ խաղող- 0,5կգ
Համեմ եւ մաղադանոս-կես կապ
Կարդացեք նաև
Թարխուն-1 կապ
Սխտոր-3-4 պճեղ
Աղ, սեւ եւ կարմիր պղպեղ՝ ըստ ճաշակի
Հավի կրծքամիս-1 կգ
Պատրաստման եղանակը
Խաղողը լվանալ, ազատել պոչերից: Աղալ մսաղացով կամ ձեռքի բլենդերով, որից հետո քամել, ստանալ հյութը:
Կանաչիները նույնպես լավ լվանալ, չորացնել, ապա մանր կտրատել: Խաղողի հյութին ավելացնել մանր կտրատած կանաչիները, ճզմած կամ մանր անցքերով քերիչով քերած սխտորը, համեմունքները:
Կրծքամիսը լվանալ, չորացնել, սուր դանակով մի քանի տեղից ծակծկել: Աղ, կարմիր պղպեղ անել եւ վրան լցնել խակ խաղողի թանձրուկից՝ այնպես, որ բոլոր կտորները պատված լինեն թանձրուկով: Դնել սառնարան առնվազն 3-4 ժամով, որպեսզի համեմվի: Մնացած թանձրուկը պահել:
Հավի կրծքամիսը կարող եք խորովել կրակի վրա, գրիլ թավայի վրա, կամ պարզապես դնել 220 աստիճան տաքացրած ջեռոցը մոտ 30-40 րոպեով:
Պատրաստի կրծքամիսը դրեք խաղողի թանձրուկով պատված ամանի մեջ, եւ վրան նորից թանձրուկ ավելացրեք:
Ճաշատեսակը պատրաստ է, եւ՝ շատ համեղ: Հատկապես լավ է համադրվում բանջարեղենով տապակած բրնձի կամ ոսպի հետ:
Ի դեպ, եթե թանձրուկից ավելանա, այն առնվազն 1 շաբաթ կարող եք պահել սառնարանում: Կարող եք այս թանձրուկով մատուցել նաեւ այլ տեսակի մսեր:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
