«Ասել՝ տուրիզմի ոլորտն անկում է ապրում, բավականին մեղմ է ասված: Հայաստանում այս ոլորտը եւ նրա հետ փոխկապակցված բոլոր ոլորտները գտնվում են աղետալի վիճակում, բայց ամենավատ վիճակում զբոսաշրջության ոլորտն է»,-ասում է «Planet Travel Club» տուրիստական ընկերության ղեկավար Արմեն Երանոսյանը: Զբոսաշրջության ոլորտի ներկայացուցչի խոսքով՝ ամենավատն այն է, որ չգիտեն ու չեն պատկերացնում՝ ինչպես պետք է դուրս գան այս վիճակից:
Այսօր պարոն Երանոսյանը «Փաստարկ» մամուլի ակումբում ներկայացրեց բոլոր այն խնդիրները, որոնց լուծումներն այդպես էլ կառավարությունը չի գտնում: Նրա խոսքով՝ բիզնեսը զարգացնելու, երկիրը գովազդելու համար շատ տուրընկերություններ վարկային միջոցներ են ներգրավել եւ այսօր չեն կարողանում այդ պարտավորությունները կատարել:
«Եթե արտակարգ դրությունից հետո մնացած ոլորտները, ինչ-որ չափով, թեթեւակի կարողացան վերականգնել իրենց դրությունը՝ այսինքն՝ որոշակի գումարներ ներգրավել, աշխատել, մենք պահպանեցինք աշխատատեղերը, բայց հայտնվեցինք հիմար իրավիճակում:
Արտակարգ դրության ժամանակ հայտարարված վարկային արձակուրդից հետո, մայիսի 25-ից սկսած, այդ ամբողջ գումարները վերաբաշխվեցին, տոկոսադրույքները նույնպես պահպանվեցին, և չնայած զբոսաշրջության ոլորտը չի աշխատում, բայց բանկերը պարտադրում են գործընկերություններին վճարել ե՛ւ այդ տոկոսները, ե՛ւ մայր գումարները»:
Արմեն Երանոսյանի խոսքով՝ անգամ շանս չունեն, որեւէ մի աղբյուրից գումարներ ներգրավել, որպեսզի բանկերի նկատմամբ պարտավորությունները կատարեն. «Քանի որ չկան եկամուտներ, ամեն մի տուրիստական կազմակերպության համար վճարել այդ գումարները՝ պատուհաս է: Ստիպված են սեփական միջոցներից վճարել, սակայն դրանք էլ չկան»:
Կարդացեք նաև
Գործընկերությունները դիմում են բանկերին՝ որոշ զիջումների գնալ, սակայն, ըստ Արմեն Երանոսյանի, բանկերը պարտադրում են մարտ ամսից սկսած՝ մինչեւ օգոստոս ընկած ժամանակահատվածը ե՛ւ մայր գումարը, ե՛ւ տոկոսները վճարել, ինչը հսկայական գումար է կազմում. «Այլապես՝ սպառնում են գցել «սեւ ցուցակ» եւ դասակարգել: Երբ պահանջում ենք վերավարկավորել մեզ, այսինքն՝ մարել նախկին վարկը, նոր վարկ տալ, որի մի մասը կուղղենք մեր գործունեությանը, որպեսզի ոտքի կանգնենք, նրանք տուրիզմը համարում են անհուսալի ոլորտ եւ մերժում են»:
Կորոնավիրուսի տնտեսական հետեւանքները չեզոքացնելու կառավարության աջակցության ծրագրերն էլ այս ոլորտի ներկայացուցիչների համար անհասանելի են: Ինչպես պարոն Երանոսյանն է ասում, ծրագրերով նախատեսված սուբսիդավորումը կամ համաֆինանսավորումը բանկերի տրամադրության ներքո է, հետեւաբար, որպես անհուսալի ոլորտ՝ տուրընկերությունների դիմումները այս ծրագրերով էլ մերժվում են:
«Ոլորտը մնացել է մեն-մենակ՝ ֆինանսական ճգնաժամի հետ: Եվ պետք է լուծի իր խնդիրները իր հնարամտությունների շնորհիվ»,-ասաց պարոն Երանոսյանը՝ հույս ունենալով, որ պետությունը գոնե այսուհետ կտա ճանապարհային քարտեզ՝ ինչպես է պատկերացնում հետագան:
Լուսինե ԲՈՒԴԱՂՅԱՆ
Տեսանյութը՝ «Փաստարկ» մամուլի ակումբի յութուբյան էջի
