ԱԱԾ նախկին տնօրեն Արթուր Վանեցյանը հերքում է այն լուրերը, որ ինքը 10 մլն պարգեւավճար է իրեն տվել՝ ԱԱԾ ղեկավարի պաշտոնում աշխատելիս: Նա ասաց, որ 2 մլն պարգեւատրում է ստացել ու այդ երկու միլիոնն էլ փոխանցել է «Հայաստան» համահայկական հիմնադրամին:
Ավելին՝ աշխատանքից դուրս գալուց հետո եւս, նրա խոսքով՝ 1 մլն դրամ է փոխանցել այդ հիմնադրամին:
Ինչպես հայտնի է, Վանեցյանին այսօր ԱԱԾ էին կանչել՝ ԱԱԾ նախին աշխատակիցներից մեկին աշխատանքի վերականգնելու հետ կապված բացատրություններ տալու: ԱԱԾ-ն այս առնչությամբ հաղորդագրություն էր տարածել, որտեղ նշել էր, որ «հիշյալ անձի պաշտոնավարման արդյունքում պետությանը պատճառված որևէ վնաս չի վերականգնվել»:
Այս առնչությամբ Վանեցյանն ասաց. «Ակնկալում եմ ԱԱԾ-ի պաշտոնական պարզաբանումը՝ իմ ունեցած տվյալներով, այդ անձի, իսկ այդ անձը եղել է մի ստորաբաժանման ղեկավար, այդ ստորաբաժանման աշխատանքի արդյունքում իր նշանակված օրվանից մինչ օրս հարուցվել է շուրջ 30 եւ ավելի քրեական գործ, որի արդյունքում վերականգնվել են մի քանի հարյուր մլն դրամի գումարներ, իսկ կոնկրետ մեկ գործով հաստատվել է 106 մլն դոլարի չարաշահում: Այդ 106 մլն դոլարանոց գործի անունը ես չեմ ուզում տալ: Խորհուրդ եմ տալիս տղամարդկություն ունենա մեր իրավապահ համակարգը եւ ասի, թե այդ արժանապատիվ սպայի, պրոֆեսիոնալ աշխատակցի գործունեության ընթացքում ինչ դրական արդյունք է ունեցել ԱԱԾ-ն եւ ի դեմս ԱԱԾ-ի՝ Հայաստան Հանրապետությունը»:
Կարդացեք նաև
Հռիփսիմե ՋԵԲԵՋՅԱՆ
