Արթուր Վանեցյանի շահերի ներկայացուցիչ փաստաբան Լուսինե Սահակյանը ԶԼՄ-ներին ասաց, որ իր պաշտպանյալը ԱԱԾ հրավիրվել էր բացատրություն տալու: «Որքան մեզ ներկայացվեց, նյութեր են նախապատրաստվում աշխատակիցներից մեկին աշխատանքի վերականգնելու համար: Սա ես օրենքի նկատմամբ ծաղր եմ համարում, որովհետեւ գոյություն ունի օրենք, որով անձը 50 տարին լրանալուց հետո, ինչը ԱԱԾ ծառայողի համար սահմանային ժամկետն է, իրավունք ունի մինչեւ 5 տարի ժամկետով երկարացնել: Տվյալ պարագայում դա է արվել:
Խնդիրը նաեւ այն չէ, թե օրենք խախտվել է կամ չի խախտվել, նրանք օրենքը կարդացել են կամ չեն կարդացել, եւ գիտե՞ն արդյոք, որ օրենքով հստակ սահմանված է, որ մինչեւ 5 տարի կարելի է ժամկետը երկարացնել: Խնդիրն այն է, որ քննարկվում է քրեական գործ հարուցելու հարց: Այսինքն, նյութեր են նախապատրաստվում: Իմ համար այս հանգամանքը շատ զարմանալի է, որովհետեւ Քրօր-ում չկա նման նորմ: Եթե անգամ խախտում եղած լիներ, անձը 60 տարեկանում վերականգնված լիներ, միեւնույն է, սա քրեական պատասխանատվություն առաջացնել չի կարող: Սրանով պետությունը, առավել եւս, որ խառնվել է ԱԱԾ-ն, հաստատում է, որ պարոն Վանեցյանի դեմ չկա ինչ-որ քրեական գործ հարուցելու որեւէ հիմք: Արդեն հասել են նրան, որ նույնիսկ այս կերպ փորձում են քրեական գործ հարուցել եւ մեղադրանք առաջադրել»,-հայտարարեց փաստաբանը:
Չնշելով՝ նախապատրաստվող գործում խոսքը բարձրաստիճան զինվորականի՞ մասին է, թե՞ շարքային ծառայողի, փաստաբանն ասաց, որ դա մի աշխատակից է, որին աշխատանքի վերականգնելու արդյունքում շատ լուրջ գումարներ են վերականգնվել:
Լուսինե Սահակյանը չի զարմանա, եթե մեկ անգամ եւս ծաղրեն օրենքը, իրավական պետության գաղափարը, փորձեն Արթուր Վանեցյանին կարգավիճակ տալ եւ կրկին հրավիրեն: Նա չի համարում, թե սա ոչ պրոֆեսիոնալ աշխատանքի արդյունք է: «Ես համարում եմ, որ սա քաղաքական հետապնդում է: Տրամաբանող որեւէ մարդ այլ դիրքորոշում ունենալ չի կարող»,-եզրափակեց փաստաբան Լուսինե Սահակյանը:
Կարդացեք նաև
Աշոտ ՀԱԿՈԲՅԱՆ
